Ermənistanın Baş naziri Nikol Paşinyan Azərbaycanla imzalanmış sülh sazişinə dair xalqa müraciət edib. O, 8 avqustda Vaşinqtonda iki ölkənin xarici işlər nazirləri tərəfindən paraflanmış sənədi Ermənistan üçün “yeni dövrün başlanğıcı” adlandırıb.

Gündəm24.az xəbər verir ki, Paşinyan bununla İrəvanın uzun illər davam edən ərazi iddialarından imtina etdiyini və Qarabağ məsələsinin bağlanmasını qəbul etdiyini bəyan edib. Baş nazirin sözlərinə görə, məhz bu addım olmadan bölgədə sülhün bərqərar olması mümkünsüz idi.

Paşinyan çıxışında Ermənistan cəmiyyətinin uzun illər “müharibə psixologiyası” ilə yaşadığını, bunun isə “xüsusi qüvvələrin ölkənin müstəqillik və dövlətçiliyini zəiflətmək məqsədilə tətbiq etdiyi alət” olduğunu vurğulayıb. O, bundan sonra təhlükəsizliyin hərbi qarşıdurma ilə deyil, institusional sülh sazişi ilə təmin ediləcəyini bildirib.

Baş nazir həmçinin Qarabağdan köçən ermənilərin geri dönüşünün “reallığa uyğun olmadığını və təhlükə daşıdığını” açıq şəkildə dilə gətirib. Onun sözlərinə görə, bu məsələ əslində yalnız Ermənistanın daxili sosial siyasətində – məcburi köçkünlərin inteqrasiyası və dəstəyi kontekstində həll olunmalıdır. Paşinyan əlavə edib ki, bu mövzunun ikitərəfli danışıqlara çıxarılması yeni gərginliklərə səbəb ola bilər.

Baş nazir “erməni əsirləri” məsələsinin də sülh sazişinə daxil edilmədiyini açıqlayıb. O, bu addımı “əsirlərin azad edilməsinin sənədin imzalanması və ratifikasiyasına qədər yubadılmaması üçün” atdıqlarını deyib. Lakin rəsmi Bakı dəfələrlə bəyan edib ki, söhbət əsirdən yox, Azərbaycan torpaqlarında törətdikləri cinayətlərə görə məhkəmə qarşısında cavab verən şəxslərdən gedir.

Paşinyanın müraciətində diqqətçəkən məqamlardan biri də Ermənistan və Azərbaycanın ABŞ prezidenti Donald Trampın Nobel Sülh Mükafatına namizədliyini irəli sürməsi oldu. Bu təşəbbüs, ekspertlərin fikrincə, Ermənistanın təhlükəsizlik məsələlərində Moskvadan uzaqlaşaraq Qərb istiqamətinə yönəldiyinin göstəricisidir.

Çıxışının sonunda Paşinyan Ermənistanın “30 ildən çox davam edən blokada və beynəlxalq təcriddən çıxdığını” bəyan edib. Bu isə İrəvanın öz daxili auditoriyası üçün “müharibəsiz həyat” narrativini leqitimləşdirmək cəhdi kimi dəyərləndirilir.

Beləliklə, Paşinyanın son müraciəti Ermənistan siyasətində dönüş nöqtəsi hesab olunur. Qarabağ iddiasından rəsmi imtina edən ölkə indi qonşularla normal münasibətlər qurmağa və regional inteqrasiyaya yönəlməyə çalışır. Lakin analitiklərin fikrincə, Paşinyan hökumətinin qarşısında ən böyük maneə daxildə mövcud olan revanşist qüvvələr və onların xarici havadarlarıdır.

Səmra İSMAYIL,
Gündəm24.az

Oxunub: 71