Rusiya Dövlət Dumasının müdafiə komitəsi sədrinin birinci müavini Aleksey Juravlyov Rusiya və Ukrayna prezidentlərinin mümkün danışıqları üçün optimal məkanların adlarını açıqlayıb. Onun sözlərinə görə, belə görüşün ən düzgün şəkildə Ukraynaya hərbi dəstək göstərməyən ölkələrdə keçirilməsi məqsədəuyğun olardı.

Gündəm24.az xəbər verir ki, Juravlyov dost münasibətlərə baxmayaraq, Macarıstanın NATO və Aİ üzvü olduğuna görə “ümumilikdə düşmən düşərgəsinin nümayəndəsi” kimi qəbul edildiyini bildirib:
“İnsanı yer deyil, yer insanı ucaldır. Əminəm ki, dünyanın istənilən ölkəsində Vladimir Putin öz danışıqlar istedadı ilə ölkəmiz üçün təsirli nəticələr əldə edə bilər. Macarıstan baş naziri Viktor Orbanın praqmatik siyasəti sayəsində bizə yaxın görünür, lakin o, NATO və Aİ üzvüdür və nəticədə düşmən blokunu təmsil edir”.

Deputat mümkün variantlar kimi Çin, Hindistan, Braziliya və Səudiyyə Ərəbistanını göstərib. O, bu dövlətlərin liderlərinin böyük həvəslə sülh sammitinə ev sahibliyi edəcəyinə və bunun tarixi hadisəyə çevrilə biləcəyinə inandığını vurğulayıb.

Səmra İSMAYIL,
Gündəm24.az

Oxunub: 4