Belarusda reaktiv yaylım atəşi sistemi olan “Polonez” raketlərinin nüvə başlıqları ilə təchiz edilməsi məsələsi gündəmə gətirilib.
Gündəm24.az xəbər verir ki, bu barədə ölkənin Təhlükəsizlik Şurasının dövlət katibi Aleksandr Volfoviç prezident Aleksandr Lukaşenkonun sədrliyi ilə keçirilən raket istehsalına dair iclasdan sonra bildirib.

Onun sözlərinə görə, hazırda “Polonez” kompleksinin raketləri 300 kilometrə qədər məsafəni vura bilir:

“Bu, ən müasir kompleksdir. Əvvəllər raketlərin uçuş məsafəsi 200 km idi, indi isə 300 km-ə qədər çatır. Bu, yüksək dəqiqlikli silahdır. Təbii ki, hər bir silah mütəmadi olaraq təkmilləşdirilməlidir. Artıq bu raketlərin nüvə başlıqları ilə təchiz edilməsi məsələsi gündəmdədir. Həmçinin “Oreşnik” texnologiyalarının müəyyən raketlərə inteqrasiyası da nəzərdən keçirilir”, – Volfoviç deyib.

Xatırladaq ki, “Polonez” MLRS ilk dəfə 2015-ci il mayın 9-da Minskdə keçirilən hərbi paradda nümayiş etdirilib. 2016-cı il iyunun 16-da isə Qomel vilayətində ilk döyüş sınaqları həyata keçirilib. Əvvəlcə sistem Çin istehsalı olan A200 raketlərinin buraxılış qurğusu kimi istifadə olunurdu. Onların uçuş məsafəsi 50–200 km arasında dəyişirdi. Sonradan Belarus mühəndisləri 300 km məsafəyə çata bilən raket istehsal edib.

Mövlam RZALI,
Gündəm24.az

Oxunub: 17