Ötən gecə təcili tibbi yardım xidmətinin gecikməsi ilə bağlı narazılıq gündəmə gəlib. Jurnalist Elmir Muradov bildirib ki, yüksək təzyiqdən əziyyət çəkən yaxın qohumuna yardım üçün edilən çağırış bir saata başa gəlib.

Gündəm24.az xəbər verir ki, Muradov baş verənlərlə bağlı sosial şəbəkədə paylaşım edərək, operativliyin təmin olunmadığını deyib.

Onun sözlərinə görə, ilkin olaraq 103-ə zəng etdikdən 10 dəqiqə sonra güclə operatora qoşula bilib:

“Müraciət qeydə alındı və ən qısa zamanda briqada göndəriləcəyi bildirildi. Amma ‘ən qısa zaman’ deyilən düz bir saata başa gəldi. 35 dəqiqə idi ki, yüksək təzyiqdən əziyyət çəkən yaxınımız üçün yardım gözləyirdik, lakin nə həkim, nə də maşın görsənmirdi.”

Muradov əlavə edib ki, vəziyyət dəyişmədiyindən yenidən 103-ə müraciət etməyə məcbur olub:

“Bu dəfə operatora qoşulmaq üçün 15 dəqiqə gözlədim. Yenidən müraciət qeydə alındı, amma çağırışın niyə yubandığını soruşduqda cavab verə bilmədilər. Suallarıma cavab verməkdə aciz qalan əməkdaşlar isə telefonu üzümə bağladılar.”

Jurnalistin sözlərinə görə, bir saatdan sonra gələn həkim briqadası məsuliyyətin çağrı mərkəzində olduğunu bildirib:

“Onlar dedilər ki, biz maşında idik, sadəcə operatorlar məlumatı gec ötürüblər. Buna görə də yardıma gecikdik. Beləliklə, bir daha TƏBİB-ə və ümumilikdə səhiyyə sisteminə etimadım sarsıldı.”

Səmra İSMAYIL,
Gundem24.az

Oxunub: 20