Aksiyada yerli sakinlərlə yanaşı, Taylandda yaşayan ABŞ vətəndaşları da iştirak edib.
Gündəm24.az xəbər verir ki, müharibə əleyhdarları Venesuela prezidenti Nikolas Maduronun azadlığa buraxılmasını tələb edərək Banqkokdakı ABŞ səfirliyinin qarşısında etiraz aksiyası keçiriblər.
Mitinqə toplaşan onlarla nümayişçi əllərində “Venesueladan əl çəkin!”, “Növbəti kim olacaq? Kolumbiya? Qrenlandiya?” və “Müharibəyə yox! İmperializmə yox!” yazılı plakatlar tutmuşdular. Yerli sakinlərlə yanaşı, Taylandda yaşayan ABŞ vətəndaşları da aksiyada iştirak ediblər.
3 yanvarda Venesuela xarici işlər naziri İvan Gil Pinto bildirib ki, ABŞ Karakasdakı mülki və hərbi obyektlərə hücum edib və Vaşinqtonun hərəkətlərini hərbi təcavüz kimi qiymətləndirib. Daha sonra Venesuelada fövqəladə vəziyyət elan olunub. ABŞ prezidenti Donald Tramp isə hücumları təsdiqləyib və Venesuela prezidenti Nikolas Maduro və həyat yoldaşının tutularaq ölkədən çıxarıldığını açıqlayıb. Onlar Nyu-Yorkun cənubundakı Bruklindəki həbsxanaya aparılıblar.
5 yanvarda Maduro və həyat yoldaşı Nyu-Yorkun Cənub Dairəsində federal məhkəmə qarşısına çıxarılıblar. ABŞ hakimiyyəti onları narkotik qaçaqmalçılığında iştirak etməkdə ittiham edir. Hər iki təqsirləndirilən şəxs günahsız olduğunu bəyan edib.
Sədaqət Həsənova
