Qeyd olunur ki, ABŞ Prezidenti Donald Trampın Qrenlandiya üzərində nəzarəti ələ keçirmək üçün ABŞ Silahlı Qüvvələrindən istifadə etməmək niyyəti ilə bağlı açıqlaması, müttəfiq ölkələri ilə bağlı sərt açıqlamalarına görə Avropa siyasətçilərini inandırmayıb.
Avropa rəsmiləri Qrenlandiya böhranı fonunda ABŞ tərəfindən xəyanətə uğradıqlarını düşünür və Vaşinqtona etibarın itirildiyini açıq şəkildə dilə gətirirlər.
Gündəm24.az xəbər verir ki, Politico-nun yazdığına görə, bəzi diplomatlar bunu dünya nizamında dərin parçalanma kimi qiymətləndirir və mövcud vəziyyəti tarixi dönüş nöqtəsi sayırlar.
ABŞ prezidenti Donald Trampın Qrenlandiyanı nəzarətə götürmək istəyi, hərbi gücdən istifadə etməyəcəyini desə də, Avropada inandırıcı qəbul olunmayıb. Aİ diplomatları bildirir ki, Qrenlandiya mövqeyinə görə ticarət tarifləri ilə hədələnmək parçalanmanı real təhlükəyə çevirib.
Avropa İttifaqında qarşıdan gələn təcili sammit Trampın Davosdakı çıxışına və son bəyanatlarına kollektiv cavab vermək üçün “terapiya” imkanı kimi dəyərləndirilir. İki Aİ diplomatı mövcud gərginliyi İkinci Dünya Müharibəsindən əvvəlki dövrlə müqayisə edib və “sakitləşdirmə siyasətinin artıq işləmədiyini” vurğulayıb.
Tramp Davosda çıxışı zamanı Qrenlandiyanı əldə etmək niyyətinə sadiq qaldığını, lakin buna güc yolu ilə nail olmağı planlaşdırmadığını bildirib. O, eyni zamanda Qrenlandiyanı dəstəkləyən Avropa ölkələrinə qarşı tariflərin fevralın 1-dən tətbiq olunmayacağını açıqlayıb, amma ABŞ-ın adanı vaxtilə Danimarkaya qaytarmasını “axmaq qərar” adlandırıb.
Qrenlandiya Danimarkanın muxtar ərazisi olaraq qalır və 1951-ci il Müdafiə Sazişinə əsasən ABŞ adanın təhlükəsizliyini təmin etməyi öhdəsinə götürüb. Tramp isə Qrenlandiyanın ABŞ üçün milli təhlükəsizlik və “Qızıl Günbəz” raketdən müdafiə sisteminin yerləşdirilməsi baxımından vacib olduğunu iddia edir.
Sədaqət Həsənova
