Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyevin “EU Today”ə müsahibəsində Rusiya və İranla münasibətlər, o cümlədən Avropa İttifaqının (Aİ) Zəngəzur dəhlizi layihəsi və ümumilikdə regiona yanaşmasından danışıb.
Hacıyev bildirib ki, Azərbaycan Aİ-nin “Qlobal Qapı” təşəbbüsü çərçivəsində yeni nəqliyyat kompozisiyasının bir hissəsi olmasını istəyir. Prezidentin köməkçisi həmçinin Zəngəzur dəhlizi vasitəsilə illik 15 milyon ton yük daşınacağını və bu dəhlizin Azərbaycanın payına düşən hissəsinin inşasının 2026-cı ilə qədər başa çatacağını açıqlayıb. Hikmət Hacıyev Bakının Avropa İttifaqını bu yeni yaranan nəqliyyat kompozisiyasında görməyə şad olacağını vurğulayıb.
Gündəm24.az Globalinfo.az-a istinadənxəbər verir ki, danışan politoloq Züriyə Qarayeva deyib ki, Azərbaycanın Zəngəzur dəhlizi ilə bağlı son bəyanatları ölkənin təşəbbüsü ilə formalaşan yeni nəqliyyat arxitekturasının artıq regional çərçivəni aşaraq qlobal oyunçuları cəlb etdiyini göstərir:
“Prezidentin köməkçisi Hikmət Hacıyevin bəyanatında ən çox diqqət çəkən məqam Azərbaycanın Avropa İttifaqını “yeni nəqliyyat kompozisiyası”nda görmək istəməsidir. Bu, təsadüfi deyil, çünki Zəngəzur dəhlizi təkcə fiziki yol yox, eyni zamanda Cənubi Qafqazın siyasi xəritəsini yenidən formalaşdıran strateji layihədir. Azərbaycanın dəhlizin öz ərazisinə düşən hissəsini 2026-cı ilə qədər tamamlamaq niyyəti isə bu prosesdə Bakının lider mövqeyini bir daha təsdiqləyir.
Züriyə Qarayeva
Aİ-nin iştirakına çağırış, həm də Avropa İttifaqının “Qlobal Qapı” təşəbbüsünün mahiyyətinə uyğundur. Brüssel Çinlə geoiqtisadi rəqabətdə Avrasiyada yeni və etibarlı alternativ marşrutlar yaratmağa çalışır və Azərbaycan burada ən uyğun tərəfdaş kimi çıxış edir. Zəngəzur dəhlizinin illik 15 milyon ton yükötürmə potensialı, həmçinin Azərbaycanın artıq formalaşdırdığı Şərq–Qərb və Şimal–Cənub dəhlizləri ilə inteqrasiya imkanı Aİ üçün ciddi strateji cazibə yaradır. Bu iştirak yalnız logistika imkanlarını artırmayacaq, həm də Avropanın Cənubi Qafqazda siyasi varlığını gücləndirəcək.
Nəticə etibarilə, Azərbaycanın Zəngəzur dəhlizi üzərində qurduğu yanaşma bölgəyə yeni oyunçuların daxil olacağını göstərir və bu oyunun qaydalarını Bakı müəyyənləşdirir. Aİ-nin prosesə qoşulması Cənubi Qafqazda güc balansını dəyişərək Azərbaycanın tranzit mərkəzi statusunu daha da möhkəmləndirəcək. Bakı bu dəhlizi təkcə türk dünyası ilə əlaqə xətti kimi deyil, həm də Qərb–Asiya strateji inteqrasiyasının əsas sütunlarından biri kimi təqdim etməyə başlayır. Bu isə Zəngəzur dəhlizini regional layihə olmaqdan çıxarıb qlobal geosiyasi platformaya çevirir”.
