2026-cı il iyulun 1-nə olan məlumata əsasən, Azərbaycanda ortaaylıq əməkhaqqı 1174 manat təşkil edib. Bu göstərici şəhər və rayonlar üzrə kəskin fərqlənir.
Gündəm24.az Dövlət Statistika Komitəsinə (DSK) istinadən xəbər verir ki, ölkə üzrə ən yüksək orta əməkhaqqı Bakıda deyil.
Paytaxt Bakıda ortaaylıq maaş 1487 manat olduğu halda, daha yüksək əməkhaqqı səviyyəsi Xankəndidə qeydə alınıb.
DSK-nın məlumatına əsasən, Xankəndidə ortaaylıq maaş 1644 manat təşkil edib.
Ümumilikdə isə Azərbaycanın şəhər və rayonlarının əksəriyyətində orta əməkhaqqı 1000 manatdan aşağıdır.
1000 manatdan yüksək orta əməkhaqqı Daşkəsəndə 1249 manat, Şuşada 1144 manat, Xocalıda 1098 manat, Zəngilanda 1047 manat, Gədəbəydə isə 1028 manat olub.
Digər şəhər və rayonlarda orta maaş 1000 manatdan aşağıdır.
Əksər bölgələrdə orta əməkhaqqının 1000 manatdan aşağı olmasına baxmayaraq, ölkə üzrə orta göstəricinin 1174 manata çatmasında Bakının xüsusi çəkisi böyükdür.
Belə ki, Azərbaycanda muzdla çalışan 1 milyon 787 min nəfərin yarıdan çoxu – təxminən 1 milyon nəfəri Bakıda işləyir.
Paytaxtda çalışanların sayının çox olması və onların orta əməkhaqqının 1500 manata yaxınlaşması ölkə üzrə orta maaş göstəricisinin də 1000 manatı keçməsinə təsir edir./sfera.az
