Rusiyadan qayıdan azərbaycanlılar ordakı dəhşətli durumu belə təsvir edir: Rusiya üçün sonun başlanğıcı. Bildirilir ki, xalq çox narazıdır, dron hücumları ara vermir, iqtisadiyyat çöküb, yanacaq qıtlığı son həddə çatıb, ümidsizlik artıb.
Bu, Prezident Vladimir Putinin rəhbərlik etdiyi hökumətə nə vəd edir? Putin bu qədər ağır vəziyyətdə Rusiyanı hara qədər idarə edə biləcək?
Globalinfo.az-a danışan Ədalət Partiyasının sədri, siyasi şərhçi Mütəllim Rəhimli deyib ki, hazırkı vəziyyət Rusiyada ciddi iqtisadi və sosial təzyiqlərin artdığını göstərir:
“Lakin bunu birbaşa “Rusiyanın sonunun başlanğıcı” və ya yaxın zamanda Putin hakimiyyətinin süqutu kimi qiymətləndirmək üçün kifayət qədər əsas yoxdur. Çünki 4 ildən çoxdur ki, bu barədə danışılır, amma reallıqda təsdiqini tapmır.
Son aylarda Ukraynanın Rusiyanın enerji və digər iqtisadi obyektlərinə dron hücumları yanacaq bazarına ciddi təsir göstərib. Avqust ayında Rusiyada neft emalı həcmi əvvəlki dövrlə müqayisədə xeyli aşağı düşüb. Bir sıra regionlarda benzin qıtlığı və ciddi növbələr yaranıb. Benzin qiymətlərinin ilin əvvəlindən 21 faizdən çox artdığı bildirilir. Sentyabrın 20-də isə Moskva neft emalı zavoduna dron hücumundan sonra emal qurğularının fəaliyyətini dayandırdığı barədə məlumat yayılıb.
Ölkənin iqtisadi göstəriciləri də kifayət qədər aşağı düşüb. Rusiya iqtisadiyyatının 2026-cı ildə artımının sıfıra yaxın olacağı gözlənilir.
Mütəllim Rəhimli
Unutmaq olmaz ki, Rusiya böyük enerji ixracatçısıdır və yüksək neft gəlirləri hələlik dövlətə hərbi xərcləri və sosial öhdəlikləri maliyyələşdirməyə imkan verir. ABŞ və Qərbin sanksiyaları da bu sahədə kifayət qədər effekt vermir. Beynəlxalq təşkilatlar yaxın müddətdə Rusiyada maliyyə çöküşünün gözlənilmədiyini proqnozlaşdırırlar.
Eyni zamanda, seçkilərinin nəticələri göstərdi ki, mövcud siyasi sistem hələ də hakimiyyətin nəzarətindədir və “Vahid Rusiya” parlamentdə üstünlüyünü qoruyub. Ancaq bütün bunlara baxmayaraq müharibənin uzanması Moskvanın həm xarici siyasətdə, həm də müharibənin maliyyələşdirilməsində manevr imkanlarını getdikcə daraldır”.
