Döyüş şəraitində döyüş əməliyyatlarında iştirak edən hərbi qulluqçuların pul təminatı ikiqat hesablanmayacaq.
Gündəm24.az xəbər verir ki, bu, Milli Məclisin bugünkü plenar iclasında müzakirə olunan “Hərbi qulluqçuların statusu haqqında” Qanunda dəyişiklik edilməsi qanun layihəsində öz əksini tapıb.
Hazırda qüvvədə olan qanuna görə, zabitlərin, gizirlərin, miçmanların və müddətdən artıq həqiqi hərbi xidmət hərbi qulluqçularının vəzifə maaşlarının minimum məbləğləri dövlət qulluqçularının orta əmək haqqından az ola bilməz.
Döyüş şəraitində döyüş əməliyyatlarında iştirak edən hərbi qulluqçuların həmin dövr üçün ödənilməli olan pul təminatı ikiqat hesablanır.
Qanun layihəsində yuxarıda sözügedən müddəaların qanunvericilikdən çıxarılması təklif edilir.
Qanun layihəsi müzakirələrdən sonra səsverməyə qoyularaq birinci oxunuşda qəbul edilib.
