Qərbi Azərbaycanın gizli incisi – Dərəçiçək mahalı haqqında bilmədikləriniz
Qərbi Azərbaycanın ən füsunkar və qədim bölgələrindən biri olan Dərəçiçək mahalı əsrlər boyu Azərbaycan xalqının yaşadığı, zəngin mədəniyyət və təsərrüfat ənənələrinin formalaşdığı yurd yerlərindən biri olub. Tarixi mənbələrdə İrəvan xanlığının mühüm mahallarından biri kimi qeyd edilən Dərəçiçək, öz təbii gözəllikləri və strateji mövqeyi ilə seçilib.
“Dərəçiçək” adı “çiçəkli dərə”, “güllü vadi” mənasını verir. Mahalın adının yaranması onun füsunkar təbiəti ilə bağlıdır. Yaz aylarında dağ yamaclarını bürüyən rəngarəng çiçəklər, sərin bulaqlar və yaşıl yaylaqlar bu ərazini Qərbi Azərbaycanın ən gözəl guşələrindən birinə çevirib.
Tarixi sənədlərə əsasən, Dərəçiçək mahalında onlarla Azərbaycan kəndi mövcud olub. Əhali əsasən əkinçilik, maldarlıq, arıçılıq və sənətkarlıqla məşğul olurdu. Mahalın münbit torpaqları və zəngin su ehtiyatları burada həyatın inkişafına geniş imkan yaradıb. Kəndlərdə qədim adət-ənənələr qorunub saxlanılır, milli-mənəvi dəyərlər nəsildən-nəslə ötürülürdü.
XIX əsrin əvvəllərində regionda baş verən müharibələr və siyasi dəyişikliklər Dərəçiçəyin taleyinə də təsirsiz ötüşmədi. Sonrakı dövrlərdə mahalın demoqrafik tərkibi dəyişdirildi, azərbaycanlı əhali müxtəlif mərhələlərdə doğma yurdlarından didərgin salındı. Bununla belə, Dərəçiçək Qərbi Azərbaycan yaddaşında ata-baba ocağı kimi öz yerini qoruyub saxladı.
Bu gün Dərəçiçək mahalı təkcə coğrafi məkan deyil, həm də Qərbi azərbaycanlıların tarixi yaddaşının, mədəni irsinin və vətən həsrətinin rəmzi kimi xatırlanır. Vaxtilə çiçəklərlə bəzənən bu gözəl mahalın adı minlərlə insanın qəlbində doğma yurd sevgisi ilə yaşayır.
Qərbi Azərbaycan İcması Sumqayıt Nümayəndəliyi
Ramiz İsmayılov
