Türkiyə Prezidenti Rəcəb Tayyib Ərdoğan növbəti həftənin əvvəlində Azərbaycana səfər edəcək.
Gündəm24.az xəbər verir ki, bu barədə diplomatik mənbələrdən məlumat verilib.
Bildirilib ki, Türkiyə Prezidenti Rəcəb Tayyib Ərdoğan oktyabrın 6-7-də Azərbaycanda keçiriləcək Türk Dövlətləri Təşkilatının (TDT) 12-ci Zirvə görüşündə iştirak edəcək.
TDT-nin Qəbələdə baş tutacaq 12-ci Zirvə görüşü regional sülh və təhlükəsizlik mövzusuna həsr olunacaq.
Qeyd edək ki, Zirvə Toplantısında üzv və müşahidəçi ölkələrin liderlərinin iştirakı gözlənilir. Zirvə görüşünə Türkiyə Prezidenti Rəcəb Tayyib Ərdoğanla yanaşı, Qazaxıstan Prezidenti Kasım-Jomart Tokayev, Özbəkistan Prezidenti Şavkat Mirziyoyev, Qırğızıstan Prezidenti Sadır Japarov, Macarıstanın Baş naziri Viktor Orban, Şimali Kipr Türk Cümhuriyyətinin Prezidenti Ersin Tatar, Türkmənistan Xalq Məsləhətinin sədri Qurbanqulu Berdiməhəmmədov da qatılacaq. (Türkmənistan Prezidenti Sərdar Berdiməhəmmədov da dəvət edilib – red.)
Qeyd edək ki, TDT-nin 11-ci Zirvə görüşü 2024-cü ilin noyabrında Qırğızıstanda, qeyri-rəsmi Zirvə görüşü isə 2025-ci ilin mayında Macarıstanın paytaxtı Budapeştdə keçirilib.
