Azərbaycanda heyvanların kütləvi şəkildə dabaq xəstəliyinə yoluxması mal-qara saxlayan kəndliləri və fermerləri çətin vəziyyətə salıb.
Gündəm24.az Oxu.Az-a istinadən xəbər verir ki, sosial şəbəkələrdə bununla bağlı aparılan müzakirələrdə xəstəliyin son günlərdə tüğyan etdiyi vurğulanır.
“Neçə vaxtdır, heyvanlar dabağa yoluxur, demək olar ki, heç nə yeyə bilmirlər. Baytarlıq şöbələri isə problemlə ciddi maraqlanmır. Bununla bağlı nə etmək lazımdır, onu deyən də yoxdur”, – şikayətçilərdən biri yazıb.
Kənd Təsərrüfatı Nazirliyi yanında Aqrar Xidmətlər Agentliyindən Oxu.Az-ın sorğusuna cavab olaraq bildirilib ki, dabaq sürətlə yayılan yoluxucu virus xəstəliyidir və bütün cütdırnaqlı, əsasən, iri və xırdabuynuzlu heyvanlarda rast gəlinir.
Bildirilib ki, bu virus ağız boşluğunda, məmə uclarında və dırnaqlar arasında ağrılı yaralar yaradır, yüksək hərarət və məhsuldarlığın kəskin azalması ilə müşayiət olunur.
“Yoluxma, əsasən, xəstə heyvanla birbaşa təmas, virusla çirklənmiş yem-su, inventar, personalın geyimləri və hava-damcı yolu ilə mümkündür. Virus torpaq və peyində həftələrlə aktiv qala bilir. Dabaq xəstəliyi respublikamız üçün endemik xəstəlikdir. Yəni bu xəstəliyin törədicisinin xəstəliyə həssas heyvanlar arasında və ətraf mühitdə dövr etməsi riskləri hər zaman mövcuddur.
Dabaq həm də transsərhəd xəstəlikdir, virus külək vasitəsilə quruda, hətta dənizlərin üzərindən belə kilometrlərlə məsafədən ətrafa yayıla və qonşu dövlətlərin ərazisindən ölkəyə keçə bilər. Həmçinin tranzit avtomobillərin üzərində də keçməsi mümkündür. Müxtəlif səbəblərdən peyvəndlənmədən yayındırılmış, vaksinasiya tədbirləri nəzərdə tutulmayan digər ölkələrdən idxal olunan heyvanlar arasında da müşahidə oluna bilər”, – məlumatda bildirilib.
Açıqlamada o da vurğulanıb ki, fermerlər bu xəstəliklə bağlı şübhəli əlamətlərlə rastlaşdıqda, məsələn, ağızda, burun aynasında, dildə, məmə uclarında aftalara (suluqlara), dırnaq aralarında yaralara rast gəldikdə dərhal baytar həkimlərinə, ərazi üzrə Heyvan sağlamlığı və baytarlıq xidməti idarələrinə (HSBXİ), Azərbaycan Qida Təhlükəsizliyi Agentliyinin (AQTA) regional bölmələrinə məlumat verməlidirlər. Xəstəliyə yoluxma şübhəsi olan heyvanı isə digərlərindən ayırmalıdırlar:
“Baytarlıq xidməti əraziyə gələnə qədər heyvan sahibi özü sadə bir üsulla – adi çay sodası ilə dezinfeksiya işləri apara bilər, həmçinin heyvanın ağzını, məmə uclarını, dırnaq aralarını soda məhlulu ilə yuya bilər. Soda beynəlxalq təcrübədə tövsiyə olunan vasitədir. Ancaq sonunda mütləq rayon HSBX idarələrinin mütəxəssislərinin iştirakı ilə lazımi tədbirlər və simptomatik müalicə aparılmalıdır.
Fermerlərin nəzərinə çatdırmaq istəyirik ki, rayon HSBX idarələrinin mütəxəssisləri hər bir çağırışa diqqətlə yanaşır və fermerin yanında olaraq, lazımi köməyi göstərərək, tövsiyələr verirlər. Onlara çağırış edirik ki, heyvanlarını mütləq peyvəndləməyə cəlb etsinlər və baytar həkimlərinə peyvəndləmə aparmaq üçün şərait yaratsınlar. Əlavə olaraq bildiririk ki, hazırda bölgələrdə dabaq xəstəliyinə qarşı peyvəndləmə tədbirləri epizootik tədbirlər planına uyğun olaraq davam etdirilir. Kənd Təsərrüfatı Nazirliyi yanında Aqrar Xidmətlər Agentliyini tərəfindən ildə iki dəfə iri və xırdabuynuzlu heyvanlarda profilaktik peyvəndləmə tədbirləri həyata keçirilir”, – deyə məlumatda qeyd edilir.
