Son dövrlər sosial şəbəkələrdə İrana bağlı qüvvələrin, o cümlədən “Müsəlman hərəkatı” adı altında fəaliyyət göstərən çevrələrin Əli Kərimliyə açıq və israrlı dəstək kampaniyasına başlaması diqqət çəkir.
Bu hərəkata bağlı şəxslərin qısa zaman ərzində video müraciətlər paylaşmaları, emosional ritorika ilə Əli Kərimlini simvolik fiqur kimi təqdim etməyə çalışmaları və onu hətta Cənubi Afrika Respublikasının keçmiş prezidenti Nelson Mandela ilə müqayisə etmələri ictimai rəydə maraqla izlənilir.
Müzakirə mövzusu təkcə daxili siyasi simpatiyalarla məhdudlaşmır. Məsələ ondan ibarətdir ki, bu fəallığın arxasında xaricdən yönləndirilmiş sifarişin dayandığına dair iddialar getdikcə daha çox səsləndirilir. Xüsusilə İranla əlaqəli dini-siyasi şəbəkələrin bu prosesdə ön plana çıxması kampaniyanın məqsədi, hədəf auditoriyası və zamanlaması ilə bağlı sualları aktuallaşdırır.
Gündəm24.az xəbər verir ki, Globalinfo.az-a danışan deputat Fazil Mustafa deyib ki, bu dəstək hər zaman olub:
“Fikrimcə, bu, böyük bir problemdir. Çünki Azərbaycan siyasətçilərinin ölkədə şəriət dövləti qurmaq, eyni zamanda qonşu ölkənin ideologiyasını təbliğ etmək istəyən bir mexanizmin təşkilatını müdafiə etməsi müşahidə olunur.
Dəfələrlə bu adamlar sözügedən təşkilatın müdafiəsinə qalxıb. “Müsəlman Birliyi” adlı təşkilatın həbsdə olan ilahiyyatçı sədri Taleh Bağırzadənin mətnlərini Azərbaycan Xalq Cəbhəsi Partiyasının sədri Əli Kərimli və Milli Şuranın qurucu üzvlərindən Cəmil Həsəli öz səhifələrində yayıblar. Bu da üzücü bir haldır”.
Deputat Hikmət Babaoğlu isə deyib ki, 1993-cü ildən bu günə qədər Azərbaycanı daxildən və xaricdən sarsıtmaq istəyən güc mərkəzlərinin iş birliyinin ən müxtəlif formalarının şahidi olmuşuq:
“Bir zamanlar özünü demokrat elan edən Əli Kərimlinin Rusiyanın sifarişlərini yerinə yetirən obrazını da görmüşük. Başqa bir vaxt isə onun İrandakı radikal islamçıların sifarişlərini yerinə yetirdiyini müşahidə etmişik. Yəni Əli Kərimlinin öz dağıdıcı məqsədləri üçün hamı ilə ittifaqa girdiyi görünür.
Hikmət Babaoğlu
Bu gün də fars şövinizminin qələbəmizi həzm edə bilməməsi səbəbilə İrandakı çevrələrin AXCP sədrini müdafiə etməsi təəccüblü deyil.
İranın Zəngəzur dəhlizinə bu günə qədərki münasibəti bəllidir. Tehranın daha əvvəl isə erməni terrorçularını dəstəklədiyini bilirdik. Ona görə sosial şəbəkələrdəki aktivlik də, məhz bununla bağlıdır. Əli Kərimli öz xalqı və dövləti ilə ittifaqda olmamaq üçün şeytanla belə ittifaqa getməyə hazırdır. Necə ki, biz o şeytanla ittifaqın şahidiyik.”
