“Heyvan ətlərinin, quş ətlərinin baytarlıq ştampları ilə nişanlanıb satılması təqdirəlayiq addımdır. Bu, çoxdan olmalı idi”.
Bu fikirləri Redaktor.az-a qida eksperti İlkin Şirinov Baş nazir Əli Əsədovun imzaladığı qərara əsasən, ətin, heyvan və quş cəmdəklərinin, digər ət məhsullarının ekspertiza aktı əsasında baytarlıq damğası və ştampları ilə nişanlanmasının məcburi olacağından danışarkən bildirdi.
“Bu, küçə satışında ət və heyvan mənşəli məhsullardan insanlara keçə biləcək xəstəliklərin qarşısının alınmasına kömək edəcək. Heyvan ətinin üzərində baytarlığın hər hansısa bir nişanı, ştampı yoxdursa, deməli, bu əti almaq və istifadə etmək məqsədəuyğun deyil. Addım bəyənilən addımdır və əsas məqsəd insanların sağlamlığının qorunmasıdır”, – deyə o qeyd etdi.
Ekspertin fikrincə, regionlarda müəyyən problemlər yaşana bilər:
“Nəzərə alsaq ki, bu gün şəxsi təsərrüfatlarda heyvanlar kəsilir, quş ətləri və heyvan ətləri satılır, burada baytarlıq nəzarətinin edilməsi çətinlik yarada bilər. Çünki kəndlərdə heyvan kəsim məntəqələri yoxdur. Kəndlərdə müəyyən adamların həyətlərində, şəxsi təsərrüfatlarda heyvanlar kəsilir və paylanılır, əti satışa çıxarılır. Burada hər hansısa bir baytarlıq ştampının olması, həkim nəzarətində olması, sanitar-gigiyenik normalara riayət olunması məsələsi bir az çətinliklər yaradır. Bu, hardasa təsərrüfat sahiblərində bir balaca narazılıq yarada bilər.
Bunun üçün rayonlarda beş-on kəndin mərkəzləşmiş bir kəsim məntəqəsi olarsa, heyvanlar orada sanitar-gigiyenik qaydalara əməl olunmuş vəziyyətdə kəsilərsə, təbii ki, bu, müsbət hal kimi qiymətləndirilə bilər”.
