2026-cı il FİFA Dünya Kubokunda J qrupunun ilk oyununda Argentina Əlcəzairi 3-0 hesabı ilə məğlub etdi və ulduz Lionel Messi Dünya Kuboku tarixində ən çox qol vuran iki oyunçudan biri oldu.
Gündəm24.az xəbər verir ki, Argentina millisinin kapitanı Lionel Messi Əlcəzairlə oyunda daha bir tarixi nailiyyətə imza atıb. Ulduz futbolçu altı fərqli Dünya Kubokunda meydana çıxan ilk oyunçu olaraq adını futbol tarixinə yazdırıb.
Kanzasda keçirilən qarşılaşmaya Dünya Kuboku karyerasında 13 qolla başlayan Messi, Əlcəzairə qarşı het-trik edərək qol sayını 16-ya yüksəldib. Bununla da o, Almaniya əfsanəsi Miroslav Kloze ilə birlikdə Dünya Kuboku tarixinin ən məhsuldar bombardiri olub. Messi növbəti qolunu vuracağı təqdirdə bu rekordun yeganə sahibi olacaq.
Əlcəzairlə matç argentinalı ulduz üçün başqa bir rekordu da yeniləyib. Messi Dünya Kuboku tarixində keçirdiyi oyunların sayını 27-yə çatdıraraq bu göstəricidə də zirvədəki mövqeyini möhkəmləndirib.
Lakin rekord yarışında Messi tək deyil. 2026-cı il Dünya Kubokunun ilk matçında Seneqala qarşı iki dəfə fərqlənən Fransa millisinin hücumçusu Kilian Mbappe də mundial karyerasındakı qollarının sayını 16-ya çatdıraraq Messi ilə eyni pilləni bölüşür. Turnirin sonuna qədər Mbappenin əsas hədəfi argentinalı ulduzu geridə qoymaq olacaq.
Digər tərəfdən, Portuqaliya millisinin lideri Kriştiano Ronaldo, İngiltərə yığmasının kapitanı Harri Keyn və Braziliya millisinin ulduzu Neymar hər biri 8 qolla siyahıda yer alır və onların da rekord yarışında söz sahibi olacağı gözlənilir.
Sədaqət Həsənova
