Bakının ən gözəl və mərkəzi məkanlarından biri — Mərkəzi Bankın qarşısında, Heydər Əliyev Sarayı ilə üzbəüz yerləşən Heydər Əliyev parkı şəhər sakinlərinin və qonaqlarının ən çox üz tutduğu istirahət guşələrindəndir. Ulu Öndər Heydər Əliyevin möhtəşəm abidəsinin ucaldığı bu geniş və mənzərəli park həm də sakitliyi, təmiz havası və günəşli mühiti ilə seçilir. Lakin son zamanlar parkın yeraltı keçidlərində yaşanan bir problem sakinlərin istirahətinə kölgə salır.
“28 May” metrostansiyası istiqamətindən Heydər Əliyev Sarayı və parka doğru yönələn yeraltı keçidlərin çıxışlarındakı eskalatorların heç biri işləmir. Dörd fərqli çıxışda yerləşdirilən bu müasir eskalatorlar sadəcə hərəkətsiz pilləkən rolunu oynayır.
Yaşlılar və uşaqlı analar əziyyət çəkir
Musavat.com əməkdaşının ərazidə müşahidə apardığı zaman parkda az insan var idi. Bura gəlmək istəyən sakinlərin, xüsusilə də yaşlı insanların və körpə arabası (uşaq arabası) ilə gəzintiyə çıxan gənc anaların yeraltı keçidlərdən istifadə etməsi böyük çətinliyə çevrilib.
Parkda həmsöhbət olduğumuz yaşlı sakinlərin sözlərinə görə, onlar hər gün bura gəlib təmiz hava almaq, günəşli havada istirahət etmək istəsələr də, eskalatorların işləməməsi səbəbindən pilləkənləri qalxıb-enməkdə çətinlik çəkirlər: “Biz hər gün bu gözəl parkda dincəlmək istəyirik. Amma eskalatorlar işləmədiyi üçün bura gəlmək bizim üçün böyük əziyyətdir”.
Oxşar narazılığı uşaq arabası ilə parkdan faydalanmaq istəyən gənc analar da dilə gətirirlər. Ağır uşaq arabalarını işləməyən eskalatorlar və ya pilləkənlərlə daşımaq məcburiyyətində qalan valideynlər haqlı olaraq sual edirlər: “Əgər biz bu infrastrukturdan rahat istifadə edə bilməyəcəyiksə, bu gözəl park və modern keçidlər kimin üçündür? Niyə paytaxt sakinləri bu şəraitdən yararlana bilmir?”
Sarayın və parkın nüfuzuna xələl gətirən mənzərə
Paytaxtın mərkəzində yerləşən və hər gün çox sayda sakinin istifadə etdiyi bu ərazidə eskalatorların uzun müddət işləməməsi həm əlçatanlıq, həm də şəhər mühitinin ümumi vəziyyəti baxımından suallar yaradır.
Üstəlik, Ulu Öndər Heydər Əliyevin adını daşıyan belə mühüm bir məkanın və Heydər Əliyev Sarayının ətrafında bu cür baxımsızlığın yaşanması həm də ərazinin ümumi görünüşünə və nüfuzuna xələl gətirir.
Söhbət yalnız eskalatorların işləməsindən getmir. Müasir şəhər infrastrukturu insanların, xüsusilə yaşlıların, uşaqların və uşaq arabası ilə hərəkət edən valideynlərin rahat və təhlükəsiz şəkildə məkana çıxışını təmin etməlidir.
Azərbaycan Prezidenti İlham Əliyevin sərəncamı ilə 2026-cı il “Şəhərsalma və Memarlıq İli” elan edilib. Belə bir ildə paytaxtın mərkəzində yerləşən, insanların gündəlik istifadə etdiyi infrastruktur obyektlərində bu cür problemlərin qalması şəhərsalma və müasir şəhər mühiti ilə bağlı qarşıya qoyulan məqsədlərin nə dərəcədə həyata keçirildiyi sualını da gündəmə gətirir. Sakinlər aidiyyəti qurumlardan yeraltı keçidlərdəki eskalatorların təmir olunaraq qısa müddətdə yenidən istifadəyə verilməsini istəyirlər.
Məsələ ilə bağlı aidiyyəti qurumlara sorğu göndərilib, cavablandırıldığı təqdirdə yayımlanacaq.//musavat.com
