16 oktyabr 2025-ci il tarixində Qərbin Azərbaycan İcmasının Sumqayıt nümayəndəliyinin gəncləri İqtisadi Zonaların İnkişafı Agentliyinin nəzdində fəaliyyət göstərən Peşə Təhsil Mərkəzində qonaq olublar.
Gündəm24.az xəbər verir ki, səfərin əsas məqsədi Mərkəzin fəaliyyəti ilə tanış olmaq və tələbələr üçün maarifləndirici seminar keçirmək olub.
Tədbiri giriş sözü ilə Peşə Təhsil Mərkəzinin nümayəndəsi Anar Nəcəfzadə açaraq tədris prosesi və Mərkəzin fəaliyyəti barədə ətraflı məlumat verib. Daha sonra Qərbi Azərbaycan İcmasının Sumqayıt nümayəndəliyinin gənclər şurasının sədri Fuad Məmmədov , eləcə də gənc elçilər Gülçin Qasımova , Gülnar Zeynalova və Məleykə Xankişiyeva çıxış ediblər.
Qonaqlar əvvəlcə Mərkəzin maddi-texniki bazası, tədris şəraiti və tələbələrin peşə hazırlığı ilə yaxından tanış olublar. Ardınca tələbələr üçün “Müstəqilliyə Gedən Yol” adlı seminar təşkil edilib.
Seminarda Qərbi Azərbaycanın tarixi, xalqımızın üzləşdiyi deportasiyalar və doğma yurdlarından məhrum edilən azərbaycanlıların taleyi barədə geniş məlumat verilib. Çıxışçılar tarixi yaddaşın qorunması, milli kimliyin möhkəmləndirilməsi və vətənə bağlılıq ruhunun aşılanmasının əhəmiyyətini vurğulayıblar.
Çıxış edən Fuad Məmmədov tələbələrə Qərbi Azərbaycan İcmasının sədri Əziz Ələkbərlinin və Sumqayıt nümayəndəliyinin sədri Ramiz İsmayılovun salamlarını çatdırıb, qərbi azərbaycanlıların Prezident İlham Əliyevin rəhbərliyi ilə doğma yurdlarına qayıdış arzusu ilə yaşadıqlarını qeyd edib. O, həmçinin Qərbi Azərbaycan həqiqətlərinin dünya ictimaiyyətinə çatdırılmasında gənclərin üzərinə düşən məsuliyyətdən danışıb.
Daha sonra Ləman Mərdanova “Suverenlik və Konstitusiya” mövzusunda çıxış edərək dövlət müstəqilliyimizin hüquqi əsasları barədə tələbələrə məlumat verib.
Görüşün sonunda tələbələr və müəllim heyəti qonaqlara müxtəlif suallar ünvanlayıb. Səmimi və maraqlı müzakirə şəraitində keçən tədbir iştirakçılar tərəfindən böyük maraqla qarşılanıb.
