6 dekabr 2025-ci il tarixində Qərbi Azərbaycan İcması Qadınlar Şurasının üzvü, millət vəkili Pərvanə Vəliyeva ilə ABŞ-ın Tennessi Texnoloji Universitetində siyasi elmlər üzrə professor, Brüsseldə yerləşən EU Turkey Civic Commission (EUTCC) adlı təşkilatın baş katibi Dr. Michael Martin Gunter arasında görüş keçirilib.
Görüş zamanı icma təmsilçisi Qərbi Azərbaycan məsələsi, eləcə də azərbaycanlıların indiki Ermənistan ərazisindən deportasiyası tarixinə dair geniş məlumat verib. Bildirilib ki, etnik təmizləməyə məruz qalan qərbi azərbaycanlılar son bir əsrdə dörd dəfə öz tarixi yurdlarından deportasiya olunublar və bütün tarixi faktlar bunu təsdiqləyir.
Daha sonra Pərvanə Vəliyeva Azərbaycanın əldə etdiyi uğurlardan, habelə, Qarabağ Zəfərindən söz açıb. Qeyd edib ki, məhz böyük Zəfərdən sonra qərbi azərbaycanlıların öz evlərinə qayıdış arzusu və sülhə inamı daha da güclənib. O, cari ilin 8 avqustunda Vaşinqtonda ABŞ Prezidenti Donald Trump, Azərbaycan Prezidenti İlham Əliyev və Ermənistan Baş naziri Nikol Paşinyan arasında keçirilən görüş zamanı tarixi sülh razılaşması, eləcə də Zəngəzur dəhlizinin – TRİPP marşrutunun çəkilməsinin regionda yeni reallıqlar yaratdığını diqqətə çatdırıb.
Dr. Michael Martin Gunter Azərbaycanın regional proseslərdə apardığı siyasəti yüksək dəyərləndirdiyini bildirib. Qeyd edib ki, Ermənistan Baş naziri Nikol Paşinyan Qarabağla bağlı vaxtilə yanlış ifadələr işlətsə də, Qarabağ azad edildikdən sonra sülh istiqamətində siyasi xəttini dəyişməyə məcbur olub. O, Ermənistanda hələ də revanşist qrupların mövcud olduğunu və Azərbaycanın bu baxımdan ayıq-sayıq olmasının vacibliyini vurğulayıb.
Tədqiqatçı alim həmçinin dayanıqlı sülh üçün tərəflərin vətəndaş cəmiyyətləri arasında dialoqun vacibliyini qeyd edib. O, Azərbaycan həqiqətləri ilə bağlı kitab yazdığını və gələcək fəaliyyətində də Azərbaycanın mövqeyini dəstəkləməyə davam edəcəyini bildirib.
Pərvanə Vəliyeva Azərbaycanın multikultural dəyərlərə verdiyi yüksək önəmi, ölkənin sülh və əmin-amanlıq naminə atdığı real və konstruktiv addımları diqqətə çatdırıb. Qeyd edib ki, dayanıqlı sülh bütün regionda iqtisadi inkişafı sürətləndirəcək.
