Qərbi Azərbaycan kəndləri – Qoturbulaq
Qoturbulaq kəndi Qərbi Azərbaycanın tarixi Qaraqoyunlu mahalında, keçmiş Çəmbərək (Krasnoselo) rayonunda, rayon mərkəzindən təxminən 8 kilometr məsafədə yerləşən qədim yaşayış məntəqələrindən biri olub. Tarixi inzibati bölgüyə görə kənd Yelizavetpol (Gəncə) quberniyasının Qazax qəzasının ərazisində yerləşib.
Kənd öz adını ərazidə yerləşən müalicəvi bulaqdan götürüb. Qoturbulaq suyundan müxtəlif xəstəliklərin, xüsusilə dəri xəstəliklərinin müalicəsində istifadə edildiyi bildirilir. Buna görə yaranan toponim Azərbaycan dilindəki “qotur” və “bulaq” sözlərinin birləşməsindən əmələ gələn hidrotoponim hesab olunur.
Kəndin tarixi yalnız toponimi ilə deyil, ərazisindəki qədim abidələrlə də diqqət çəkir. Qoturbulaqda V–VII əsrlərə aid olduğu göstərilən qədim məbəd və qəbirüstü abidələr qeydə alınıb. Məbəd kəndin yol kənarındakı təpəlik ərazisində yerləşir və çay daşı ilə əhəngdən inşa edilib.
Qoturbulağın qədim qəbiristanlığında bir neçə tarixi qəbirüstü abidənin olduğu qeyd edilir. Mənbələrə görə, kənd sakinlərinin 1988–1989-cu illərdə deportasiya edilməsindən sonra qəbiristanlıqdakı abidələrin bir hissəsi dağıdılıb, qalan bəzi daşlara isə sonradan müxtəlif işarələr əlavə olunub.
Kənd 1918–1919-cu illərdə baş verən hadisələrdən də təsirlənib. Tarixi mənbələrdə Qoturbulağın 1920-ci ilin sonuna qədər Gəncə quberniyasının Qazax qəzasının Çəmbərək nahiyəsinin tərkibində olduğu göstərilir.
Sonrakı dövrdə kəndin adı dəyişdirilərək Ttucur (Turşsu) formasına salınıb. Qoturbulaq adı isə tarixi Azərbaycan toponimi kimi yadda qalıb. Mənbələrdə kəndin ərazisinin qədim türk mənşəli yaşayış izləri və tarixi abidələrlə zəngin olduğu qeyd olunur.
Qoturbulaq bu gün Qərbi Azərbaycanın Çəmbərək mahalının tarixi kəndlərindən biri kimi xatırlanır. Kəndin adı, müalicəvi bulağı və qədim abidələri onun tarixi yaddaşımızdakı yerini qoruyur.
Qərbi Azərbaycan İcması Sumqayıt Nümayəndəliyi
Ramiz İsmayılov
