ABŞ prezidenti Donald Tramp yanvarın 2-də özünün Truth sosial media platformasında yazıb ki, “Əgər İran dinc etirazçıları atəşə tutub zorakılıqla öldürərsə, bu, onların adətidir, Amerika Birləşmiş Ştatları onların köməyinə gələcək”.
Gündəm24.az xəbər verir ki, ABŞ-ın İranın daxili işlərinə müdaxiləsi bütün Yaxın Şərqdə sabitliyi pozacaq və Vaşinqtonun regiondakı maraqlarına ciddi zərbə vuracaq. Bu barədə İranın Ali Milli Təhlükəsizlik Şurasının katibi Əli Laricani ABŞ prezidenti Donald Trampın İrandakı etirazçılarla bağlı açıqlamalarına cavab olaraq bildirib.
Laricani X sosial şəbəkəsində yazıb ki, İran hakimiyyəti etiraz edən tacirlərlə dağıdıcı elementləri ayırd edir, lakin Amerikanın bu daxili proseslərə müdaxiləsi regionda xaos yaradacaq və ABŞ maraqlarının məhvinə gətirib çıxaracaq. Onun sözlərinə görə, Trampın açıqlamaları İranda vəziyyəti gərginləşdirməyə yönəlib və təhrikçi tərəfin kim olduğu açıq görünür.
İran təhlükəsizlik rəsmisi vurğulayıb ki, Amerika xalqı baş verə biləcək nəticələrin məsuliyyətinin Trampın üzərində olduğunu anlamalı və öz əsgərlərinin taleyi barədə düşünməlidir. Xatırladaq ki, Tramp yanvarın 2-də Truth platformasında İranda dinc etirazçılara qarşı zorakılıq olacağı təqdirdə ABŞ-ın müdaxilə edəcəyini bəyan etmişdi.
Qeyd edək ki, dekabrın 29-da İran milli valyutasının kəskin ucuzlaşması fonunda Tehranın mərkəzində tacirlərin etiraz aksiyaları başlayıb. Prezident Məsud Pezeşkian etirazçılarla dialoqun qurulmasını tapşırıb və bank-maliyyə sektorunda islahatların aparılacağını açıqlayıb.
Sədaqət Həsənova
