Son dövrlər Bakıda bazar və mağazalarda aşağı qiymətə satılan kərə yağlarının sayının artması istehlakçılar arasında ciddi suallar doğurur. Əsl kərə yağının istehsal xərcləri nəzərə alınanda bəzi məhsulların bazar qiymətindən xeyli ucuz təklif edilməsi onların keyfiyyəti və tərkibi ilə bağlı şübhələri artırır.
Bəs ucuz kərə yağlarının sirri nədədir?
Mövzu ilə bağlı KONKRET.az-a danışan qida məsələləri üzrə ekspert İlkin Şirinov bildirib ki, kərə yağı adı altında satılan bəzi məhsulların keyfiyyəti aşağı olur və onlar istehlakçılara təbii məhsul kimi təqdim edilir.
Ekspertin sözlərinə görə, hazırkı şəraitdə 18-23 litr süddən təxminən 1 kiloqram kərə yağı əldə etmək mümkündür:
“Bu gün bir litr süd orta hesabla 1-1,20 manat arasında satılır. Hesablasaq, təkcə xammal üçün 18-25 manat xərc tələb olunur. Bunun üzərinə enerji, işçi qüvvəsi, qablaşdırma və digər istehsal xərcləri də əlavə edilir.
Nəticədə təbii kərə yağının 1 kiloqramının maya dəyəri təxminən 25-30 manat arasında formalaşır. Bu rəqəm südün yağlılıq dərəcəsindən asılı olaraq dəyişə bilər. Südün yağlılığı yüksək olduqda daha az miqdarda süddən daha çox yağ əldə etmək mümkündür”.
İ.Şirinov qeyd edib ki, belə olan halda bazarda 8-10 manata satılan məhsulların tərkibi barədə suallar yaranır:
“Əgər əsl kərə yağının maya dəyəri bu qədərdirsə, onda 8-10 manata satılan məhsulun tərkibi nədir? Belə məhsulların tərkibində palma yağı, soya yağı və digər bitki mənşəli yağlar ola bilər. İstehlakçıları çaşdıran əsas məqamlardan biri də məhsulların üzərində yazılan ifadələrdir. “Kərə tərkibli yağ”, “kərə ətirli yağ” kimi adlarla satılan məhsullar əsl kərə yağı deyil. Alıcı məhsulun etiketinə diqqət yetirməli, yağlılıq dərəcəsini və tərkibini yoxlamalıdır. Təbii kərə yağında süd qoxusunu hiss etmək mümkündür”.
Ekspert ucuz qiymətin bəzi hallarda məhsulun son istifadə müddəti ilə əlaqədar olduğunu da vurğulayıb:
“Bəzən məhsulun istifadə müddətinin başa çatmasına az qaldığı üçün şirkətlər onu daha aşağı qiymətə satışa çıxarırlar. Lakin bəzi hallarda etiketlərin yenilənməsi və ya tarixlərlə manipulyasiya edilməsi kimi halların da baş verməsi istisna deyil. Bu səbəbdən istehlakçılar məhsulun istehsal və son istifadə tarixlərini diqqətlə yoxlamalıdırlar”.
Mütəxəssis hesab edir ki, istehlakçılar ilk növbədə qiymətə deyil, məhsulun tərkibinə və keyfiyyət göstəricilərinə diqqət yetirməlidirlər.
Onun fikrincə, həddindən artıq ucuz qiymət əksər hallarda məhsulun təbii kərə yağı olmamasından xəbər verir.
