Azərbaycan Respublikasının Prezidenti İlham Əliyevin həyata keçirdiyi dövlət siyasətində regionların sosial-iqtisadi inkişafı, vətəndaşların rifah halının yüksəldilməsi və milli məsələlərin ardıcıl və prinsipial şəkildə həlli əsas prioritetlərdən biridir. Bu siyasətin bariz nümunələrindən biri də Sumqayıt şəhərinə, sumqayıtlılara və Qərbi Azərbaycandan deportasiya olunmuş soydaşlarımıza göstərilən xüsusi diqqət və qayğıdır.
Prezident İlham Əliyevin tapşırıq və göstərişləri əsasında son illər Sumqayıt şəhərində genişmiqyaslı abadlıq-quruculuq işləri həyata keçirilmiş, şəhərin sənaye potensialı əhəmiyyətli dərəcədə gücləndirilmiş, yeni istehsal müəssisələri və minlərlə iş yeri yaradılmış, sosial infrastruktur əsaslı şəkildə yenilənmişdir. Dövlət başçısının Sumqayıta mütəmadi səfərləri, icra olunan layihələrlə yerində tanış olması bu diqqətin formal deyil, davamlı və real xarakter daşıdığını aydın şəkildə göstərir.
Bu ümumi dövlət siyasətinin yerli səviyyədə uğurla icrası Sumqayıt Şəhər İcra Hakimiyyətinin başçısı Zakir Fərəcovun rəhbərliyi altında şəhər rəhbərliyinin məqsədyönlü, ardıcıl və prinsipial fəaliyyəti ilə birbaşa bağlıdır. Məhz bu idarəçilik yanaşması nəticəsində Sumqayıt şəhəri köklü şəkildə yenilənmiş, abadlıq və quruculuq baxımından ölkənin ən nümunəvi şəhərlərindən birinə çevrilmişdir.
Şəhər rəhbərliyinin həyata keçirdiyi ardıcıl abadlıq tədbirləri çərçivəsində park və xiyabanlar salınmış, mövcud istirahət məkanları əsaslı şəkildə təmir edilmiş, geniş yaşıllıq zolaqları yaradılmış, küçə və prospektlər müasir standartlara uyğun abadlaşdırılmışdır. Bu işlər Sumqayıtın ümumi şəhər mühitini və memarlıq simasını köklü şəkildə dəyişmişdir.
Eyni zamanda yaşayış massivlərində kompleks təmir-bərpa işlərinin aparılması, çoxmənzilli binaların fasadlarının yenilənməsi, piyada səkilərinin və işıqlandırma sistemlərinin müasir tələblərə uyğunlaşdırılması şəhər sakinləri üçün daha rahat, təhlükəsiz və sağlam yaşayış mühitinin formalaşmasına xidmət edir. Abadlıq siyasətinin yalnız şəhər mərkəzini deyil, ucqar məhəllə və qəsəbələri də əhatə etməsi şəhər rəhbərliyinin sosial ədalət və balanslı inkişaf prinsipinə sadiqliyinin göstəricisidir.
Fiziki abadlıqla yanaşı, Sumqayıtda milli-mənəvi dəyərlərin qorunması, tarixi yaddaşın yaşadılması və ictimai birliklərin fəaliyyətinə dəstək də şəhər rəhbərliyinin diqqət mərkəzində saxlanılır. Bu baxımdan Qərbi Azərbaycan İcmasının Sumqayıt şəhərində ofislə təmin edilməsi və həmin ofisin Qərbi azərbaycanlıların ixtiyarına verilməsi mühüm ictimai-siyasi əhəmiyyət daşıyan addım kimi dəyərləndirilir. Bu qərar deportasiya olunmuş soydaşlarımızın təşkilatlanmasına, hüquqlarının müdafiəsinə və tarixi həqiqətlərin sistemli şəkildə cəmiyyətə çatdırılmasına real imkanlar yaradıb.
Bu gün Qərbi Azərbaycan İcmasının Sumqayıt nümayəndəliyinin ofisi Qərbi azərbaycanlılar üçün təkcə inzibati məkan deyil, eyni zamanda bir mərkəz, bir həmrəylik ünvanı və fəal ictimai platformadır. Burada icmanın tədbirləri keçirilir, maarifləndirici görüşlər, konfranslar, dəyirmi masalar təşkil olunur, gənclərlə məqsədyönlü iş aparılır və Qərbi Azərbaycan həqiqətləri ardıcıl şəkildə təbliğ edilir.
Şəhər rəhbərliyi Qərbi Azərbaycan İcmasının fəaliyyətinə davamlı diqqət və dəstək göstərir, icmanın təşkil etdiyi tədbirlərə yaxından yanaşır və bu istiqamətdə həyata keçirilən təşəbbüsləri dəstəkləyir. Anım mərasimlərində, ictimai müzakirələrdə və rəsmi tədbirlərdə Qərbi azərbaycanlıların tarixi yurdlarına qayıdış hüququnun beynəlxalq hüquqa əsaslandığı xüsusilə vurğulanır.
Bu yanaşma Prezident İlham Əliyevin Qərbi Azərbaycan məsələsini dövlət siyasətinin əsas istiqamətlərindən birinə çevirməsinin yerli səviyyədə uğurla davam etdirildiyini göstərir. Dövlət başçısının Qərbi azərbaycanlıların hüquqlarını beynəlxalq tribunalarda ardıcıl şəkildə müdafiə etməsi, bu məsələnin sülh, ədalət və beynəlxalq hüquq prinsipləri əsasında həllini irəli sürməsi icmaların fəaliyyətinə güclü mənəvi və siyasi dəstək verir.
Prezident İlham Əliyevin sumqayıtlılara və Qərbi azərbaycanlılara göstərdiyi bu diqqət nəticəsində Sumqayıt şəhərində ictimai fəallıq, milli birlik və həmrəylik daha da möhkəmlənmişdir. Bu gün Sumqayıt təkcə sənaye və abadlıq mərkəzi deyil, eyni zamanda milli yaddaşa sahib çıxan, tarixi ədalətin bərpasını dəstəkləyən və güclü dövlətçilik mövqeyi ilə seçilən bir şəhər kimi formalaşmışdır.
Nəticə etibarilə, Prezident İlham Əliyevin strateji dövlət siyasəti, şəhər rəhbərliyinin ardıcıl fəaliyyəti və Qərbi Azərbaycan İcmasının fəallığı Sumqayıtda fiziki abadlıqla yanaşı, mənəvi və ictimai inkişafın da təmin olunmasına xidmət edir. Bu vəhdət Azərbaycan dövlətinin gücünü, vətəndaşına bağlılığını və milli məsələlərdə qətiyyətli mövqeyini bir daha aydın şəkildə nümayiş etdirir.
İlkin Şirinov
Qərbi Azərbaycan İcması Sumqayıt Nümayəndəliyi
Gündəm24.az
