Sumqayıt şəhərinin 8-ci mikrorayonunda yaşayan sakinlər dayanacaq ərazisində yolun vəziyyətindən narazıdırlar.
NOCOMMENT.az-ın redaksiyasına müraciət edən sakinlərin sözlərinə görə, 4-cü mikrorayonla üzbəüz yerləşən dayanacağın qarşısındakı yol elə asfaltlanıb ki, yol yox, sanki təpədir.
Sakinlər bildirirlər ki, yolun bir hissəsi həddindən artıq hündür, digər hissəsi isə çala kimi aşağı vəziyyətdədir. Bu isə həmin ərazidən keçən avtobusların hərəkətində ciddi çətinlik yaradır.
Belə ki, avtobuslar yolun bu hissəsindən keçərkən bir tərəfi yuxarıda, digər tərəfi isə aşağıda qalır. Sakinlərin sözlərinə görə, sərnişinlərlə dolu avtobusların bu vəziyyətdə hərəkəti təhlükə yaradır və hər an aşma riski meydana çıxa bilər.
Sakinlər yolun bərabər səviyyədə və təhlükəsiz şəkildə bərpa edilməsini Azərbaycan Avtomobil Yolları Dövlət Agentliyindən (AAYDA) xahiş edirlər.
