Qərbi Azərbaycan İcmasının Sumqayıt şəhər nümayəndəliyində gənclərlə diskussiya xarakterli geniş görüş keçirilib.
Gündəm24.az xəbər verir ki, tədbirin əsas mahiyyəti Sumqayıt Dövlət Universitetinin (SDU) müəllimi Gülçin Qasımova tərəfindən İsveçdə “Qərbi Azərbaycana qayıdış” mövzusu üzrə keçirilən görüşlərin nəticələrinin təqdim olunması, xarici ölkələrdə Qərbi Azərbaycan həqiqətlərinin təbliği təcrübəsinin bölüşülməsi və bu istiqamətdə gənclərin rolunun gücləndirilməsi olub.
Tədbiri giriş sözü ilə açan Qərbi Azərbaycan İcmasının Sumqayıt şəhər nümayəndəliyinin sədr müavini İlkin Şirinov iştirakçıları salamlayaraq belə görüşlərin mütəmadi şəkildə davam etdiriləcəyini bildirib. O, gənclərin ictimai proseslərdə fəal iştirakının və Qərbi Azərbaycan həqiqətlərinin təbliğində rolunun vacibliyini vurğulayıb. Daha sonra Qərbi Azərbaycan İcmasının Gənclər Şurasının sədri Fuad Məmmədov çıxış edərək, gənclərin beynəlxalq platformalarda Qərbi Azərbaycan reallıqlarının çatdırılmasında aktiv rol almasının əhəmiyyətini qeyd edib.
Gülçin Qasımova çıxışında İsveçdə keçirdiyi görüşlər barədə geniş məlumat verərək, “Qərbi Azərbaycana qayıdış” ideyasının xarici auditoriyalarda müzakirəsi, insanların göstərdiyi maraq və verilən suallar barədə danışıb. O, bu istiqamətdə gənclərin daha fəal olmasının vacibliyini xüsusi vurğulayıb.
Tədbirdə çıxış edən ictimai fəallardan Tural İsmayılov Qərbi Azərbaycan həqiqətlərinin gənclər arasında daha geniş təbliğinin vacibliyini qeyd edərək, gənclərin bu sahədə təşəbbüskar olmasının önəmini vurğulayıb. Ramin Məhərrəmov icmalar arasında birliyin gücləndirilməsinin və Qərbi Azərbaycan məsələsinin gələcək nəsillərə düzgün şəkildə ötürülməsinin vacibliyini bildirib. Əli Kərimli isə tələbə gənclərin bu prosesdə aktiv iştirakının, universitetlərdə maarifləndirmə işlərinin genişləndirilməsinin və gənclər təşkilatlarının rolunun artırılmasının önəmini diqqətə çatdırıb.
Sonda tədbir çərçivəsində geniş fikir mübadiləsi aparılıb, gənclərin sualları cavablandırılıb və gələcək fəaliyyət istiqamətləri müzakirə olunub. SDU-nun tələbəsi Kənan Əliyevin sazda ifa etdiyi rəngarəng musiqi nömrəsi isə tədbirə xüsusi rəng qatıb. Görüş səmimi və diskussiya xarakterli atmosferdə başa çatıb.
