Azərbaycanda kişilərə uşağın doğulması ilə əlaqədar 14 günlük ödənişli məzuniyyətin verilməsi təklifi cəmiyyətdə birmənalı qarşılanmayıb. Əksəriyyət düşünür ki, bu addım əslində uşaqpulu ödənişindən yayınmaq üçün atılır, real maddi dəstək əvəzinə, formal qərar təqdim olunur.
Kişilərə nə qədər ödəniş edilməlidir ki, ailə üzərinə düşən yük kompensasiya edilə bilsin? Yaxud əksinə uşaq pulunun bərpa edilməsi daha məqsədəuyğundur?
Gündəm24.az Globalinfo.az-a istinadla xəbər verir ki, deputat Fazil Mustafa deyib ki, bu proses uşaqpulu ilə əlaqələndirilə bilməz:
“Bu, ailənin yeni vəziyyətə uyğunlaşması və müəyyən çətinlikləri birlikdə aradan qaldırması üçün tanınan hüquqdur. Qadının xəstəxanadan çıxarılması, evdə yerləşdirilməsi, körpənin ilkin dövrdə nəzarətə götürülməsi kimi proseslərdə hər iki valideyn iştirak etməlidir. Ona görə də bu məzuniyyət humanist addım kimi tətbiq olunur və Avropa da daxil olmaqla bir çox ölkələrin təcrübəsində mövcuddur. Sözügedən hüququ müavinət və ya uşaq puluna bağlamaq doğru deyil”.
Fazil Mustafa
Deputat qeyd edib ki, uşaqpulu ayrıca məsələdir və müəyyən kateqoriyadan olanlara müavinət formasında verilir:
“Müzakirə edilə biləcək məsələlərdən biri yalnız bu kateqoriyanın genişləndirilməsidir. “Uşaqpulu verilmir” kimi populist yanaşmalar mövzunu təhrif edir. Əslində, bu müavinət konkret qruplara ödənilir və həm dövlət büdcəsində, həm də Dövlət Sosial Müdafiə Fondunun (DSMF) büdcəsində bununla bağlı ayrıca maddələr mövcuddur. Gələcəkdə bu sahədə əhatə dairəsinin genişləndirilməsi ilə bağlı addımların atılması mümkündür”.
Qeyd edək ki, uşağın doğulması ilə əlaqədar kişilərə ödənişli məzuniyyət verilməsi qanunvericiliyə salınır. Bu barədə məsələ Milli Məclisin Regional məsələlər komitəsinin bu gün keçirilən iclasında müzakirəyə çıxarılan Əmək Məcəlləsinə təklif edilən dəyişiklikdə öz əksini tapıb. Layihəyə əsasən, uşağının doğulması ilə əlaqədar kişilərə tibb müəssisəsinin arayışı əsasında doğuşdan əvvəl və doğuşdan sonra olan dövrdə cəmi 14 təqvim günü müddətində ödənişli məzuniyyət veriləcək.
