ABŞ prezidenti Donald Tramp Vaşinqtonda Avropa liderləri və Ukrayna prezidenti Vladimir Zelenski ilə “çox yaxşı danışıqlardan” sonra Kiyev və Moskva rəhbərlərinin görüşünə hazırlıq görür. Tramp iddia edib ki, Vladimir Putin guya məhz onun naminə sülh sazişi imzalamağa hazırdır. Bu barədə o, Fransa prezidenti Emmanuel Makrona Ağ Evdə keçirilən sammitdə etiraf edib.


“Düşünürəm ki, Putin həqiqətən də saziş imzalamaq istəyir. Məncə, bunu mənim üçün etmək istəyir. Nə qədər qəribə səslənsə də…” – Tramp bildirib.

Gundem24.az xəbər verir ki, lakin ertəsi gün FOX News-a müsahibəsində ABŞ lideri fikrini dəyişərək, Putinin sülhə hazır olub-olmadığından şübhələndiyini deyib: “Bəlkə də, Putin Ukrayna ilə razılaşma istəmir. Onun niyyətini yaxın iki həftədə daha aydın görəcəyik”.

Sammitin nəticələrini şərh edən Litvanın İsveçdəki səfiri, sabiq xarici işlər naziri Linas Linkyaviçyus bildirib ki, Ankoricdə Tramp faktiki olaraq təşəbbüsü Putinin əlinə verib: “O, Rusiyanın milli maraqlarını anlayışla qarşıladı, sanksiya hədələrindən imtina etdi və Moskvanın ‘ərazilərin mübadiləsi’ ideyasına susqun razılıq verdi. Bu isə Ukraynanın hesabına baş verəcək”.

Diplomatın sözlərinə görə, Ağ Evdə Avropa liderləri ilə keçirilən görüş bir qədər konstruktiv ab-hava yaradıb, lakin əsas məsələ dəyişməyib: Rusiya heç bir tələbindən geri çəkilməyib. “Moskva yalnız güc arqumentinə reaksiya verir. Ona görə də Qərb iqtisadi təzyiqi artırmalı, Ukraynanı isə lazım olan bütün silahlarla təchiz etməlidir”, – Linkyaviçyus qeyd edib.

O həmçinin bildirib ki, Moskva “ərazi güzəşti” məsələsini irəli sürməklə Zelenskini tələyə salmağa çalışır: “Kreml yaxşı anlayır ki, Ukrayna prezidenti ölkəsinin suveren ərazilərindən imtina edə bilməz. Odur ki, Zelenskinin rədd cavabı sonra Rusiyanın ‘baxın, biz sülh təklif etdik, amma Kiyev istəmədi’ ritorikasına çevriləcək”.

Litvalı diplomat əlavə edib ki, Trampın planlaşdırdığı formatlarda – iki, üç və ya dörd tərəfli görüşlərdə də ciddi nəticə gözləmək çətindir. Çünki Rusiya mövqeyini dəyişmir, danışıqlarda isə konkret addımlar yox, sadəcə protokol görüntüləri ön plana çəkilir.

Səmra İSMAYIL,
Gundem24.az

Oxunub: 37