Son günlər bəzi sosial media platformalarında Azərbaycan ərazisindən Körfəz ölkələri istiqamətində guya raketlərin buraxılması ilə bağlı tamamilə əsassız və həqiqətəuyğun olmayan məlumatlar yayılıb. İordaniyanın rəsmi “Petra” xəbər agentliyi, eləcə də “əl-Dustur”, “əl-Bələd”, “Neyruz” və digər xəbər portalları Azərbaycanın Əmmandakı səfirliyinin bununla əlaqədar bəyanatını dərc edib.
Gündəm24.az xəbər verir ki, bəyanatda regionda mövcud olan gərginlik fonunda sosial şəbəkələrdə mənbəyi təsdiqlənməmiş, qeyri-dəqiq informasiyaların yayılmasının ictimai rəydə yanlış təsəvvürlərin formalaşdırılmasına xidmət etdiyi və məqsədli dezinformasiya xarakteri daşıdığı bildirilir. Bu kimi cəhdlər qətiyyətlə pislənilir.
Qeyd olunur ki, bu növ iddialar ya qəsdən təxribat xarakteri daşıyır, ya da tamamilə məsuliyyətsiz və əsassız yanaşmanın nəticəsidir. Müasir texnoloji imkanlar şəraitində raket və ya digər uçuş vasitələrinin hansı istiqamətdən buraxıldığını müəyyən etmək çətin deyil.
Bəyanatda həmçinin bildirilir ki, region və Körfəz ölkələri müasir radar və müşahidə sistemlərinə malikdir və bu sistemlər vasitəsilə obyektlərin mənşəyi və trayektoriyası aydın şəkildə müəyyən olunur.
Bəyanatda, eləcə də Azərbaycan Respublikasının mövqeyi bir daha vurğulanır. Qeyd olunur ki, ölkəmiz beynəlxalq hüququn prinsiplərinə, dövlətlərin suverenliyinə və regional sabitliyin qorunmasına daim sadiqdir. İordaniya mətbuatında yayılmış rəsmi bəyanatda bütün tərəflərə yalnız yoxlanılmış və etibarlı mənbələrə istinad etmək, təsdiqlənməmiş məlumatların yayılmasından çəkinməklə bağlı çağırış edilir. Media subyektləri və sosial şəbəkə istifadəçiləri informasiya yayımı zamanı yüksək peşəkarlıq və məsuliyyət nümayiş etdirməyə, yalnız rəsmi və etibarlı mənbələri əsas götürməyə, şübhəli və manipulyativ xarakterli məlumatların yayılmasına yol verməməyə səslənir.
