ABŞ Prezidenti Donald Trampın siyasətinə və administrasiyasına etiraz edən qruplar bu il 1 sentyabrda keçiriləcək Əmək Günü münasibətilə ölkə ərazisində yüzlərlə nümayiş təşkil etməyə hazırlaşır.

Gundem24.az xəbər verir ki, məlumata görə, May Day Strong təşkilatı və həmkarlar ittifaqları birgə olaraq 765 etiraz aksiyası keçirəcək. Aksiyaların şüarı isə “Workers Over Billionaires” — “Milyarderlərdən əvvəl işçilər” olaraq müəyyən edilib. Bundan əlavə, Respublikaçılar Partiyasının seçki dairələrinin sərhədlərini dəyişdirməsinə etiraz edən qruplar da milli bayramda nümayişlər keçirməyi planlaşdırır.

Qeyd edək ki, ABŞ-da Əmək Günü hər ilin sentyabr ayının birinci bazar ertəsi qeyd olunur. İlk dəfə 1882-ci il 5 sentyabrda qeyd olunan bu gün, 1887-ci ildə Oreqon ştatında qeyri-iş günü elan olunub.

Yeddi il sonra isə ABŞ Konqresi Əmək Gününü ümumxalq qeyri-iş günü statusuna yüksəldib.

Əli Səfərli,
Gundem24.az

Oxunub: 0