Tələbəlik illərində çox çətin günlər yaşamışam. Novruz çəkilişlərinə gedirdim. Hələ 7-ci sinifdə oxuyanda teatrda çalışırdım. Universitetdə oxuyarkən kirayədə qalırdım. Qrup yoldaşlarımın hamısının evi var idi, bir mən kirayədə yaşayırdım. Elə gün olub ki, metro ilə getməyə pulum olmayıb.
Gündəm24.az xəbər verir ki, bu sözləri aktyor İlkin Misgərli “Zarafat bir yana” proqramında deyib.
Aktyor tələbəlik illərində yaşadığı maddi çətinliklərdən danışıb:
“Universiteti bitirdikdən sonra yenidən teatra qayıtdım. Gördüm ki, alınmır, dolanışıq çətindir. Sonra kloun kimi çalışdım, az da olsa, pul qazandım. Çox ağır işdir. Eləsi var bilir ki, bu da insandır, eləsi də var oynadığın yerdə diş çöpü batırır, bir həftə gəzə bilmirsən. Daha sonra layihələr gəldi, şükür bu günümə. Bura çatana qədər çox əziyyət çəkmişəm”.
İlkin estetik əməliyyatından da söz açıb. O, saç əkdirdiyini və prosesin asan keçmədiyini deyib:
“Saç əkdirdim, 8 saat əməliyyatda qaldım. Amma indi deyirlər ki, yaraşmır, bu nədir. Üçüncü dəfə də əməliyyat etdirəcəyəm, ondan sonra bu proses bitəcək”.
İlkin bir müddət əvvəl yayılan ölüm xəbərindən danışarkən “Bir hala düşdüm ki. Altına bir musiqi qoymuşdular ki, kövrəldim. Hamı da mənə yazır. Get başqasına yaz da” sözlərini əlavə edib.
İlkin məşhur “Qılman həkim” obrazından, atasını müalicə edən həkimdən danışıb:
“Atam onkoloji xəstə idi. Onun istifadə etdiyi ağrıkəsici dərman yalnız bir həkimdə olurdu. Tez-tez ona zəng edirdim. Bir gün telefonu açıb dedi: “Nə olub, bezdirdin məni, yeyib-içməkdəyəm”. Mən də cavab verdim ki, atamın vəziyyəti ağırdır, dərman yalnız səndə var, onu haradan tapaq? O isə “Sonra gələrəm” dedi. Həmin hadisədən sonra “Qılman Həkim” obrazını yaratdım. Anam mənə dedi ki, həkimin adını birbaşa çəkmə, amma bu yolla qisasını al. Mən də həmin obrazı acığa yaratdım. Maraqlıdır ki, sonradan o həkim də eyni xəstəlikdən dünyasını dəyişdi”. Axşam.az
