Mədəniyyət naziri Adil Kərimli yerli mediaya müsahibəsində bildirib ki, Azərbaycan toyları mədəniyyətin ayrılmaz hissəsi olmaqla yanaşı, milli incəsənətin təbliği üçün də mühüm platforma hesab olunur. Nazir qeyd edib ki, toy məclislərində Üzeyir Hacıbəylinin və Azərbaycan bəstəkarlarının musiqilərinə daha çox yer verilməlidir.
Mövzu ilə bağlı Modern.az-a danışan əməkdar artist, bəstəkar-müğənni Elza Seyidcahan bildirib ki, bu fikirlərlə tam razıdır:
“Ümumiyyətlə, mən bu fikirlə bəli, əlbəttə ki, razıyam. Çünki Üzeyir Hacıbəylinin simasında bizim bəstəkarlarımız silsiləsi davam edir. Kino filmlərdən, tamaşalardan gözəl mahnılar, xalq mahnılarımız var ki, artıq onlar bəstəkar mahnılarına çevrilmiş kimi böyük əsərlərdə istifadə olunur. Niyazi kimi böyük dirijorumuz, Fikrət Əmirov kimi bizim bəstəkarımız xalq mahnılarından öz əsərlərində istifadə edib və biz də bu ənənəni davam etdiririk”.
“Mən də bu yaxında “Sarı gəlin” mahnısını bir kompozisiyamda istifadə etmişəm. Hər zaman mən xalq mahnılarımıza, folklorumuza müraciət edirəm”.
Elza Seyidcahan bildirib ki, toy məclislərində bayağı və mənasız mahnıların çoxalması musiqi zövqünü korlayır:
“Toylarda lazım deyil yeni-yeni, üzr istəyirəm, yersiz, mənasız mahnıları “yeni mahnı” adı ilə camaata təqdim edib onların zövqünü korlamaq. Elə bizim mahnı kitablarımız var ki, orada bəstəkarların çox gözəl mahnıları var. Onları yeni aranjimanlarda oxusalar, çox gözəl səslənər”.
“Bugünkü gündə mən süni zəkaya baxıram ki, bizim bəstəkar mahnılarımızı onlar hazırlayırlar. Süni zəka belə bizim bəstəkar mahnılarımızı sevə-sevə oxuyur. Amma bəzi özünü müğənni adlandırmaq istəyənlərin nə musiqi savadı var, nə auditoriya savadı”.
Əməkdar artist toy mərasimlərindəki bəzi şou elementlərini də tənqid edib:
“Misal üçün, açılışı bir dənə vağzal havası ilə gəlinlə bəy daxil olsa və yaxud da Üzeyir Hacıbəylinin operettalarından gözəl açılışlarla olsa. Çox aşırı dərəcədə bunu edirlər. Qılınclarla, fəşəklərlə, darambultu ilə. Sanki gəlin elə bil davaya gəlir. Oğuz elidir, gələcək burada kəsib-doğramağa”.
“Toyun içində mənə elə gəlir ki, bu qədər aşırılıq insanları yorur”.
Elza Seyidcahan bildirib ki, bəzi toy məclislərində Azərbaycan bəstəkarlarının əsərləri arxa plana keçirilir:
“Daha çox rus bəstəkarlarının, dünya bəstəkarlarının, Avropa bəstəkarlarının əsərlərinə rəqslər qururlar. Adətən öz bəstəkarlarının mahnılarını ikinci plana keçirirlər. Məncə bunu da nəzərə almaq lazımdır”.
Sənətçi “Vağzalı”nın toyların himni olduğunu vurğulayıb:
“Vağzal mütləq toyda olmalıdır. Çox heyfsilənirəm ki, bəzi gənclər düşünür ki, vağzal artıq o biri dönəmdə qaldı. Heç də yox. Bir gəlin ki, vağzal ilə zala daxil olur, o vağzal havası həmişə o gəlini qoruyacaq, onun dayağı olacaq, onun isməti olacaq, onun xanımlığı olacaq”.
“Vağzal havasında o qədər fəlsəfə var ki, o qədər duyğu var ki, o qədər xeyir-dua var ki. Mən çox məyus oluram ki, bəzi gənclər vağzal ilə yox, tamam başqa bizim aidiyyatımız olmayan mahnılarla daxil olurlar. Toy ömürdə bir dəfə olur. Vağzal gəlinin, bəyin himnidir, onların loqosu, emblemi, rəmzidir”.
Əməkdar artist bəzi gənclərin “müasirlik” anlayışını da tənqid edib:
“Az qalıb ki, gəlinlər evdən də vağzal ilə çıxmasınlar, Çarlestonla çıxsınlar. Elə bilirlər ki, vağzal köhnəlikdir. Yox, müasirlik bu deyil”.
Sənətçi qeyd edib ki, özü də toy mərasimləri üçün müxtəlif mahnılar bəstələyib:
“Mən “Gəlinimiz” mahnısı bəstələmişəm. Bayatılardan “Haqışda” mahnısı bəstələmişəm. Bəy üçün “Bəylər bəyi” yalısı bəstələmişəm. Gəlin üçün “Ağ çiçəyim”, “Mehriban gəlin” mahnıları bəstələmişəm”.
