Bu sabah eyvanımdan Günəşi salamlayıb yola çıxıram...
İstiqamət Avropa!
İlk dayanacağımız Çexiyadır. Şengen ərazisinə tarixi gündə daxil oluruq. Aprein 10-dan rəqəmsal qeydiyyat dövrü başlayır – Şengen ölkələrində pasport ştampı sistemi ləğv edilir.
Qeydiyyat prosesi uğurla başa çatır.
Beləliklə, ən çox görmək istədiyim şəhərlər siyahısında olan Praqa ilə tanışlıq başlayır.
Bir vaxtlar Praqanı Avropanın ürəyi adlandıranlar yanılmayıb. Orta əsr atmosferi, tarix, müasir şəhər həyatı, təbiətin möhtəşəm harmoniyası ilə Avropanın mərkəzindəki bu şəhərə elə ilk gündən aşiq oluram. Duyğularım məni yanıltmayıb.
14-cü əsrdə inşa edilən Karl Körpüsü barokko üslublu heykəlləri, musiqiçilər və rəssamlarla şəhərə xüsusi ab-hava qatır.
Praqa qalası dünyanın ən böyük qala kompleksi hesab edilir. Çexiya prezidentinin rəsmi iqamətgahıdır. Qala daxilindəki Müqəddəs Vitus Katedralı möhtəşəm memarlığı ilə diqqət çəkir.
Qala ərazisində yerləşən Royal Garden qədim ağac və çiçəkləri, romantikası ilə ayrı bir aləmdir. Buradakı Kraliça Annanın yay sarayının bir az kədərli tarixi var. Bu bağ da, saray da onun şərəfinə yaradılıb. 15 övlad dünyaya gətirib, amma heç biri həyatda qalmayıb. Özü isə 45 yaşında, sonuncu uşağının dünyaya gətirərəkən dünyadan köçüb.
Köhnə Şəhər meydanındakı məşhur Astronomik Saatı hər kəs həyəcanla izləyir. Hər saatın tamamında üstündəki heykəllərin hərəkəti çox marağa səbəb olur.
Şəhərdə “Frans Kafkanın başı” adlı heykəl xüsusi diqqət çəkir. Daim hərəkətdə olan heykəl yazıçının “Çevrilmə” əsərindən təsirlənərək hazırlanıb.
Daha bir maraqlı məqam – Praqada avtobus, taksi və velosipedlər eyni zolaqda hərəkət edir. Yerdə yazılan “pozor” sözünü görəndə bir az təəccübləndik. Sonra öyrəndik ki, Çex dilində mənası diqqət deməkdir. Diqqət, tramvay var!
Praqa həm də dadlı yeməkləri və şirniyyatları ilə məşhurdur.
Bu şəhəri enerjisi, ab-havsı, gözəlliyi ilə çox sevdim.
Artıq yenidən qayıtmaq istəiyim şəhərlər siyahısındasan, Praqa!/bakupost.az
