Bakıda 214 nömrəli marşrut xətti üzrə hərəkət edən avtobusda sürücü və sərnişin arasında dava düşüb.
Gündəm24.az Bakupost-a istinadən xəbər verir ki, hadisənin görüntüləri sosial şəbəkələrdə yayılıb.
Kadrlardan məlum olur ki, mübahisəyə sürücünün avtobusa minən sərnişinlərə “rədd olun, keçin arxaya” deməsi səbəb olub. Xanım sərnişinlərdən biri sürücünün bu ifadəsinə etiraz edərək iradını bildirib.
Bundan sonra tərəflər arasında əvvəlcə sözlü mübahisə yaranıb. Söhbət getdikcə daha da gərginləşib, tərəflər bir-birinə yüksək səslə qışqırmağa başlayıblar. Kadrlarda sürücünün sərnişinə qarşı söyüş və nalayiq ifadələr işlətdiyi də eşidilir.
Daha sonra sürücü sərnişinlərdən ayrılan arakəsmə şüşəsinə zərbələr endirib. Hadisə anını lentə alan xanım sərnişin isə sürücünün davranışına etirazını davam etdirib.
Qarşıdurma avtobus hərəkətdə olarkən də davam edib.
Gərginlik zamanı sürücü “Komsomol dairəsi”ndə bütün sərnişinləri avtobusdan düşürəcəyini və avtobusu sürməyəcəyini deyib.
Hadisə ilə bağlı AYNA-ya sorğu ünvanlamışıq.
