Noyabrın 23-də Goranboyda yaşayış binasında uçqun baş verməsi ictimaiyyətdə narahatlıqla qarşılanıb. Bildirilir ki, eyni vəziyyət Bakıda da yaşana bilər. Xüsusilə istismar müddəti keçmiş xeyli sayda yaşayış binalarının mövcud olduğu vurğulanır.
Belə faciə paytaxtda da təkrarlana bilərmi? Fövqəladə Hallar Nazirliyi (FHN) hərəkətə keçməli, yoxlamalara başlamalıdırmı?
Gündəm24.az Globalinfo.az-a istinadən xəbər verir ki, əmlak eksperti Elnur Azadov deyib ki, ölkədə istismar müddəti bitmiş 20-25 min bina var və əsasən 1970-ci illərə kimi inşa olunub:
“Rəsmi statistika olmadığına görə dəqiq rəqəm demək mümkün deyil. Amma FHN-nin 1100 binanın yararlılığı ilə bağlı məlumatı məlumdur. Aidiyyəti dövlət qurumlarına bildirilib ki, həmin binalarda istismar müddəti bitib və yaşayış üçün qismən təhlükə var. Bu 1100 binanın 193-ü barədə qısa zaman ərzində sökülməsi təklif edilib, çünki yaşamaq risklidir. Sözsüz ki, binaların təhlükəsizliyi ilə bağlı məsuliyyət ilk növbədə FHN-nin üzərinə düşməlidir”.
Elnur Azadov
Ekspert bildirib ki, hazırda ölkədə istismar müddəti bitmiş binalarla bağlı proses ləng gedir:
“Nazirlər Kabinetinin 2017-ci ilin aprel ayında qəbul edilən 83 saylı qərarına əsasən, Bakı şəhərinin 1-ci mikrorayonunda yerləşən kvartalda binalar sökülüb yenisi ilə əvəz olunmalı idi. Bu proses pilot layihə kimi nəzərdə tutulmuşdu və gələcəkdə belə təcrübə Bakının digər ərazilərinə də şamil olunmalı idi. Həmçinin həmin praktikadan istifadə etməklə ölkənin digər bölgələrində istismar müddəti bitmiş çoxmənzilli binaların yenilənməsi prosesi həyata keçirilməli idi. Bu ilin mart ayında Nazirlər Kabinetində müvafiq dövlət qurumlarının iştirakı ilə iclas keçirildi. Həmin 193 binanın qəzalı olması ilə bağlı bir neçə tikili söküldü. Prezidentin Ehtiyat Fondundan 100 milyon manat civarında vəsait ayrılmışdı. Lakin bu, çox az məbləğdir. Belə böyük binaların sökülməsi üçün kifayət etmir”.
Elnur Azadov qeyd edib ki, qalan binaların sökülməsi ilə bağlı məsələ Dövlət Arxitektura və Şəhərsalma Komitəsinin səlahiyyətindədir:
“Onlar çox güman ki, elan verib təlimatlar hazırlamalı, prosesə tikinti şirkətlərini cəlb etməlidirlər. Bildiyim qədər, tikinti şirkətləri arasında tender keçirilməlidir, yəni hansı müəssisə hansı ərazini götürmək və vətəndaşlara kompensasiya vermək niyyətindədir. Təəssüf ki, bu sahədə şəffaflıq yoxdur. Heç bir rəsmi məlumat təqdim edilmir”.
