Yollardakı problemlər və xüsusilə dayanma-durma ilə bağlı tətbiq olunan cərimələr taksi sürücülərinin sayına da təsir göstərir. Sürücülər iddia edirlər ki, yüksək cərimələrə görə müxtəlif taksi şirkəti platformalarında işləmək əvvəlki qədər sərfəli deyil. Nəticədə şirkətlər yeni sürücü cəlb etməkdə çətinlik yaşayırlar.
Mövzu ilə bağlı “Bolt” taksi şirkətindən Redaktor.az-a bildirildi ki, taksi xidmətlərinin səmərəli fəaliyyəti üçün şəhər mobilliyi infrastrukturu, o cümlədən sərnişinlərin təhlükəsiz şəkildə mindirilməsi və endirilməsi üçün uyğun məkanların mövcudluğu mühüm əhəmiyyət daşıyır:
“Belə məkanların məhdud olduğu ərazilərdə sürücülər üçün dayanma və sərnişinlərin mindirilib-endirilməsi ilə bağlı çətinliklər yarana bilər. Bu istiqamətdə AYNA tərəfindən taksi dayanacaqlarının və mindirmə-endirmə zonalarının artırılması istiqamətində işlər aparılır. “Bolt” olaraq biz də bu prosesə dəstək verir, aidiyyəti qurumlarla mütəmadi əməkdaşlıq edirik. Platformamızın məlumatları əsasında sərnişinlərin ən çox mindiyi və endiyi məntəqələr, eləcə də əsas hərəkət istiqamətləri barədə aylıq məlumatlar təqdim edərək gələcək planlaşdırma və infrastrukturun təkmilləşdirilməsinə töhfə verməyə çalışırıq. İnanırıq ki, dövlət qurumları və özəl sektor arasında davam edən əməkdaşlıq nəticəsində həm sürücülər, həm də sərnişinlər üçün daha rahat və səmərəli şəhər mobilliyi mühiti formalaşacaq”.
