Son buraxılış imtahanlarından sonra abituriyentlər və valideynlər arasında yaranan narazılıqlar fonunda DİM sədri Məleykə Abbaszadənin açıqlaması müzakirələri daha da qızışdırıb.
Gündəm24.az NOCOMMENT.az-a istinadən xəbər verir ki, Dövlət İmtahan Mərkəzinin İdarə Heyətinin sədri bildirib ki, imtahan suallarının proqramdan kənar olması ilə bağlı səsləndirilən iddialar əsassızdır və belə fakt varsa, konkret göstərilməlidir. O vurğulayıb ki, bütün suallar təsdiqlənmiş tədris proqramı və kurikulum çərçivəsində hazırlanır.
Lakin bu açıqlama sosial şəbəkələrdə gözlənildiyinin əksinə olaraq narazılığı səngitmədi, əksinə daha da artırdı. Bir çox abituriyent və valideynlər hesab edir ki, imtahan suallarının bir hissəsi həddindən artıq çətin olub və ayrılan vaxt sualları cavablandırmaq üçün kifayət etməyib.
Sosial mediada yayılan şərhlərdə bəzi istifadəçilər DİM rəhbərliyinin mövqeyini sərt tənqid edərək, imtahan sistemində dəyişikliklərin vacib olduğunu bildiriblər. Bəzi paylaşımlarda isə qurum rəhbərliyinin məsuliyyət daşımalı olduğu barədə fikirlər səsləndirilib.
Beləliklə, imtahanlarla bağlı onsuz da gərgin olan vəziyyətdə səsləndirilən bu açıqlama ictimai müzakirələri daha da alovlandırıb və mövzunu yenidən gündəmin mərkəzinə gətirib.
