ABŞ Prezidenti Donald Tramp İsrailin “Hizbullah”a qarşı həyata keçirdiyi hərbi strategiyanı və Baş nazir Benyamin Netanyahu ilə olan münasibətlərini şərh edib. O, İsrailin “Hizbullah”la mübarizədə daha təmkinli və effektiv yanaşma nümayiş etdirə biləcəyini vurğulayıb.
NOCOMMENT.az xarici mediaya istinadən xəbər verir ki, Tramp Netanyahuya olan şəxsi rəğbətinə baxmayaraq, onun bəzi hərbi addımlarını tənqid edib. ABŞ Prezidenti qeyd edib ki, Netanyahu, ümumilikdə yaxşı insan olsa da, bəzən emosional qərarlar verir. Tramp, xüsusilə, İsrailin Livandakı hərbi əməliyyatlarında həddindən artıq güc tətbiq etməsinə toxunaraq bildirib ki, hər dəfə bir terrorçu binaya girəndə bütün binanı uçurmağa ehtiyac yoxdur. O, misal olaraq çölə düşən iki pilotsuz uçuş aparatına görə Beyrutda binaların dağıdılmasını qeyri-effektiv addım kimi dəyərləndirib.
Tramp İsrailin “Hizbullah”la mübarizədə daha peşəkar və “daha yaxşı” nəticələr əldə edə biləcəyini söyləyərək, ABŞ-ı böyük, İsraili isə çox kiçik tərəfdaş kimi xarakterizə edib. ABŞ lideri, həmçinin keçmişə nəzər salaraq, Netanyahunun vaxtilə Barak Obama administrasiyasını İranla nüvə sazişini (JCPOA) imzalamamaq üçün dilə tutduğunu, lakin cəhdlərinin nəticəsiz qaldığını xatırladıb. Tramp özünün bu sazişə qarşı çıxdığını və İsraili “dəhşətli” hesab etdiyi bu sazişin ağır nəticələrindən qorumaq üçün müdaxilə etdiyini bildirib.
