Siyasi proseslərin gərginləşdiyi bir vaxtda AXCP sədri Əli Kərimli barəsində seçilmiş həbs qətimkan tədbirinin apellyasiya mərhələsinə çıxarılması ölkə gündəminin əsas mövzularından birinə çevrilib. İttihamların ağırlığı, istintaqın davam etməsi və proses ətrafında səsləndirilən müxtəlif fikirlər cəmiyyətdə ciddi müzakirələr doğurub. Xüsusilə də apellyasiya məhkəməsinin hansı qərarı verəcəyi sualı ictimaiyyətdə böyük maraqla izlənir.
Gündəm24.az KONKRET.az-a istinadən xəbər verir ki, Mövzu ilə bağlı Azad Vətən Partiyasının sədri Akif Nağı açıqlamasında bildirib ki, hazırda istintaqın ilkin mərhələsi davam edir və Dövlət Təhlükəsizliyi Xidməti tərəfindən araşdırmalar aparılır:
“İlkin tədqiqat işləri gedir. Faktlar toplanır, şahidlər dindirilir. Məlumatlar tam toplanandan sonra iş məhkəməyə göndəriləcək. Ona görə də indidən konkret nəsə demək mümkün deyil. Hazırda həbs qərarı verilibsə, deməli, kifayət qədər əsas mövcuddur və ittihamlar təsadüfi deyil”.
Akif Nağının sözlərinə görə, Kərimliyə qarşı irəli sürülmüş ittihamlar, hakimiyyəti, konstitusiya quruluşunu dəyişməyə cəhd və dövlətə xəyanət xüsusilə ağır kateqoriyaya aiddir. O, qeyd edib ki, ittihamların mahiyyətinə görə məhkəmənin yumşaq qərar verəcəyi gözlənilmir:
“Bu ağır işdir, ittihamlar da çox ciddi xarakter daşıyır. Ramiz Mehdiyevin işində olduğu kimi, hər iki şəxsə eyni səviyyədə qərar və cəza veriləcəyi ehtimal olunur. Kərimliyə 2 ay 15 gün həbs müddəti müəyyən edilməsi göstərir ki, materiallar çoxdur və əlavə araşdırmalara ehtiyac var”.
Partiya sədri hesab edir ki, apellyasiya mərhələsində də yüngül qərar verilməsi real görünmür. Əlamətlər onu göstərir ki, sərt qərar olacaq.
