Bekem ailəsi qalmaqalı sadəcə tabloid sensasiyasından daha çox, əsl nəsil münaqişəsinə çevrildi. Bu qalmaqal, Bruklin Bekemin valideynləri ilə çətin münasibətləri barədə ilk dəfə açıq şəkildə danışdığı açıq ictimai şərhi ilə başladı.
Gündəm24.az xəbər verir ki, Devid Bekem və Viktoriya Bekemin illərdir ictimaiyyətə təqdim olunan “ideal ailə” obrazı böyük oğulları Bruklin Bekhemin səmimi paylaşımından sonra ciddi şəkildə sarsılıb. Bruklin emosional açıqlamasında valideynlərini onun həyatına həddindən artıq nəzarət etməkdə, şəxsi qərarlarına müdaxilə etməyə çalışmaqda və ailəni media üçün nümunəvi bir “brend” kimi təqdim etmək istəməkdə ittiham edib.
Onun sözlərinə görə, valideynləri aktrisa Nikola Peltzlə toyuna da təsir göstərməyə cəhd ediblər. Bruklin iddia edir ki, toy ərəfəsində ondan “Bekhem” soyadından istifadə hüququnun verilməsi tələb olunub, münaqişə isə bununla bitməyib. O bildirib ki, Viktoriya Bekem son anda gəlinlik paltarını tikməkdən imtina edib, hətta yeni evlənənlərin ilk rəqsi üçün seçilən musiqiyə belə müdaxilə olunub.
Bruklin etiraf edib ki, ailəsi üçün brend və ictimai imic səmimi münasibətlərdən daha ön planda olub. Bu səbəbdən hazırda barışıq üçün heç bir imkan görmədiyini, həyat yoldaşı ilə sakit və şəxsi bir həyat qurmaq istədiyini bildirib. O əlavə edib ki, uşaqlıqdan bəri daim nəzarət altında yaşayıb və daxili ağrıları barədə ilk dəfə indi açıq danışır. Onun sözlərinə görə, uzun illər qorunan “mükəmməl ailə” görüntüsü ilə daxili hissləri tez-tez ziddiyyət təşkil edib və əvvəlki dialoq cəhdləri real dəyişikliklərə gətirib çıxarmayıb.
Bruklin Bekemin paylaşımı ailənin pərəstişkarları arasında geniş reaksiyalara səbəb olub, şokdan sərt tənqidlərə qədər müxtəlif fikirlər ortaya çıxıb. Sosial mediada hətta “toy videosu”nun yayımlanmasına çağırışlar edilib, amma Devid Bekem açıqlamalara birbaşa münasibət bildirməyib və münaqişə ilə bağlı təmkinli davranıb.
Dünya İqtisadi Forumunda CNBC-yə çıxış edən Bekem sosial medianın gənclər və onların əqli sağlamlığı üçün təsirindən danışıb, amma oğlunun açıqlamalarına birbaşa toxunmayıb. Onun sükutu həm oğlunun şəxsi sərhədlərinə hörmət, həm də ailə məsələlərini ictimaiyyət qarşısında qızışdırmamaq kimi qiymətləndirilir. Fanatlar isə Bruklinin açıqlamalarını “mükəmməl ailə fasadından bezmə” və ya “gənclik emosional reaksiyası” kimi şərh edir, bunun isə məşhur Bekhem brendinə təsiri barədə müzakirələr davam edir.
Sədaqət Həsənova
