Güney Azərbaycan ədəbiyyatı adından 183 nəfərin imza toplayaraq Azərbaycan Yazıçılar Birliyinin (AYB) Güney Azərbaycan şöbəsinin müdiri, yazıçı Sayman Aruzun onları təmsil etməməli olduğunu deməsi böyük müzakirələr yaradıb.
Bəyanatda qeyd olunur ki, Sayman Aruzun “Güney Azərbaycan şöbəsi” adı ilə həyata keçirdiyi fəaliyyət ədəbi birliyin inkişafına xidmət etmir, əksinə, qurumu şəxsi təsir dairəsinə yönəlmiş məhdudlaşdırıcı struktura çevirir.
Gündəm24.az Globalinfo.az-a istinadən bildirir ki, bununla bağlı Sayman Aruzla əlaqə yaradıb.
O bildirib ki, bəyanatda yer alan “Güney Azərbaycanın tanınmış yazarları” ifadəsi düzgün deyil:
“Güney Azərbaycanın tanınmış yazarları tamam başqa insanlardır. Orada göstərilən 183 imzanın 160-170 nəfəri cəmiyyətə tanış deyil. Onların kimliyi bilinmir. Aralarında 5-6 nəfərin fəaliyyəti cəmiyyət tərəfindən tanınır. Həmin şəxslər dəfələrlə İranın dini liderinə (Ayətullah Əli Xamenei) şeirlər yazaraq mükafat alan, zaman-zaman öndə gedən ədəbi xadimlərimizə hücumlar təşkil edən adamlardır. Təəssüf ki, İranda 3 şair bir yerə toplaşanda ETELLAAT (İranın Kəşfiyyat Nazirliyi) onları hədəfə alır. Orada ana dilimiz, milli-mədəni fəaliyyətlərimiz, ümumilikdə Azərbaycanla bağlı hər şey qadağandır. Amma 183 şair kiminsə dəstəyi ilə bir araya gələrək Azərbaycan daxilində təxribat törədir. Kampaniyanın arxasında hansı qüvvələrin dayanması ciddi sual yaradır. Bu, mənə qarşı hücum deyil, ümumilikdə Azərbaycan dövlətinə və mədəniyyətinə qarşı yönəlmiş addımdır”.
S.Aruz fəaliyyətinin hər zaman ümummilli birliyimizə xidmət etdiyini vurğulayıb:
“Cənubi Azərbaycan və dünya azərbaycanlıları ilə bağlı dövlət siyasətinin təbliğinə töhfələr vermişik. Bundan əlavə, 35-dən çox kitab çap etmişik, müxtəlif qurultaylarda Cənubi Azərbaycanla bağlı məruzələr hazırlamışıq. Orada imza atanların çoxu şəxsən mənim qonağım olub, onların yaradıcılığının inkişafında böyük xidmətim var. Evimdə qonaq olan, çörəyimi kəsən insanlar bu gün anti-Azərbaycan qüvvələrinin təsiri altına düşüblər”.
Yazıçı bildirib ki, Cənubi Azərbaycan anlayışı daha genişdir:
“Orada 45 milyon azərbaycanlı yaşayır, bu qədər insan içində 183 şair sanki dənizdə bir damladır. Biz orada ən azı 18-20 min imza toplayarıq və bu, yalnız ikitirəliyə yol açar. Amma intriqaların yaranmasının qarşısını alırıq. Ədəbiyyat yaradıcılıq meydanıdır, qoy, şeir, kitab yazsınlar, milli-mədəni dəyərlərimizi müdafiə etsinlər. Bacarırlarsa, İran dövlətindən Azərbaycan dilinin tanınmasını tələb etsinlər, həbsdə aclıq edən milli fəallarımız üçün kampaniya təşkil etsinlər, Urmiya gölünün xilası üçün ictimai çağırışlar olsun. Azərbaycanda Cənubi Azərbaycan naminə çalışan yeganə təmsilçini hədəfə almaq kimə sərf edir? Təkrar edirəm, bu, mənə yox, Azərbaycan dövlətinə və milli həmrəyliyimizə qarşı yönəlmiş kampaniyadır. Diqqətli olmaq lazımdır”.
