Yaponiya rekord istilərlə üz-üzə qalıb. Ölkədə havanın temperaturunun 40 dərəcəni aşmasından sonra meteoroloqlar ilk dəfə “amansız isti gün” xəbərdarlığı elan ediblər.
Gündəm24.az milliaz-a istinadən xəbər verir ki, Yaponiya Meteorologiya Agentliyinin məlumatına görə, apreldən tətbiq olunan yeni təsnifata əsasən, temperaturun 40 dərəcədən yuxarı olduğu günlər “kokuşobi” (“amansız isti gün”) kimi qiymətləndirilir.
Son günlər Qudzyo, Tadzimi və Toyota şəhərlərində temperatur göstəriciləri 40 dərəcəni keçərək yeni rekordlar müəyyənləşdirib. Ölkə üzrə meteoroloji müşahidə məntəqələrinin üçdə birindən çoxunda isə temperatur 35 dərəcədən yüksək olub.
Güclü istilər artıq insan sağlamlığına da təsir göstərib. Niiqata və Kanaqava şəhərlərində isti hava ilə bağlı ölüm halları qeydə alınıb.
Mütəxəssislərin sözlərinə görə, rekord temperatur gündəlik həyatla yanaşı, kənd təsərrüfatı və idmana da ciddi təsir edir. İsti hava düyü istehsalına mənfi təsir göstərdiyindən fermerlər daha davamlı məhsullara və avokado kimi alternativ bitkilərin yetişdirilməsinə yönəlirlər.
Yüksək temperatur səbəbindən ölkənin məşhur məktəbli beysbol çempionatının keçirilmə qrafiki də dəyişdirilib. İştirakçıların sağlamlığını qorumaq üçün oyunlar əsasən səhər və axşam saatlarına salınıb.
Alimlər bildirirlər ki, iqlim dəyişikliyi ilə mübarizə istiqamətində ciddi tədbirlər görülməzsə, gələcəkdə açıq havada keçirilən idman və digər fəaliyyətlər daha da məhdudlaşa bilər.
İsti hava iş mühitinə də təsir edib. Elektrik enerjisinə qənaət məqsədilə həyata keçirilən “Cool Biz” proqramı çərçivəsində şirkətlər əməkdaşlara daha rahat geyimlərdən istifadə etməyi tövsiyə edir. Beləliklə, ənənəvi kostyum və qalstuk yerini daha yüngül geyimlərə verməyə başlayır.
Yaponiyada müşahidə olunan rekord istilər iqlim dəyişikliyinin ölkənin sosial və iqtisadi həyatına təsirini daha da artırır.
