İran Xarici İşlər Nazirliyi bir sıra kütləvi informasiya vasitələrində Hörmüz boğazının guya bağlanması ilə bağlı yayılan sensasion məlumatları rəsmən təkzib edib. Nazirliyin rəsmi nümayəndəsi İsmayıl Bəqai mətbuatda tirajlanan bu iddiaları tamamilə əsassız adlandırıb.
Gündəm24.az Musavat.com-a istinadla xəbər verir ki, İsmayıl Bəqai İran Silahlı Qüvvələrinin 18 iyun 2026-cı il tarixli müharibənin dayandırılması barədə memorandumuna uyğun olaraq zəruri tədbirlər gördüyünü bildirib.
Onun sözlərinə görə, kommersiya gəmilərinin Hörmüz boğazından təhlükəsiz keçidini təmin etmək üçün hər bir addım atılıb və hazırda bu strateji marşrut üzrə gəmiçilik normal, adi rejimdə davam etdirilir.
Buna baxmayaraq, beynəlxalq mediada boğaz ətrafında gərginliyin artması ilə bağlı fərqli iddialar yer almaqdadır. Almaniyanın nüfuzlu “Bild” nəşri daha əvvəl məlumat yayıb ki, İran Hörmüz boğazından gəmilərin keçidini məhdudlaşdırıb, hətta ərazidə xəbərdarlıq atəşləri açılıb. İslam İnqilabı Keşikçiləri Korpusunun (SEPAH) radio mesajı vasitəsilə ticarət gəmilərinə boğazdan uzaq durmaları barədə xəbərdarlıq etdiyi iddia olunurdu. Yerli mənbələr isə gəmiçiliyin yalnız əvvəlcədən rəsmi müraciət və Tehranın müəyyən etdiyi xüsusi qaydalara riayət olunmaqla mümkün olduğunu bildirirdi. Lakin rəsmi Tehran bu iddiaların reallığı əks etdirmədiyini bəyan edib.
Digər tərəfdən, ABŞ-nin CNN telekanalının məlumatına görə, Vaşinqton Tehrana İsrailin Livana hücumları davam etdirməməyə razılıq verdiyi barədə mühüm bir mesaj çatdırıb.
Qeyd edək ki, iyunun 19-na keçən gecə İsrail ordusu Livanın cənubunda yerləşən “Hizbullah” qruplaşmasının 80-dən çox hədəfinə (komanda və raket buraxılış məntəqələrinə) intensiv zərbələr endirib, nəticədə 16 nəfər həlak olub.
Bölgədəki bu hərbi gərginlik diplomatik proseslərə də ağır zərbə vurub. Belə ki, bu gün İsveçrədə keçirilməsi planlaşdırılan ABŞ-İran danışıqları qəfil təxirə salınıb. Vaşinqton tərəfi bu addımı logistika çətinlikləri ilə əlaqələndirsə də, “Hizbullah”a bağlı media resursları görüşün gecikməsinin birbaşa İsrailin Livandakı son hərbi əməliyyatları ilə bağlı olduğunu iddia edir.
