İranın Naxçıvana endirdiyi zərbə bölgədə onsuz da gərgin olan vəziyyəti daha da ağırlaşdırıb. Xüsusilə hadisənin dərs saatlarında, uşaqların məktəbdə olduğu vaxt baş verməsi məsələni daha da narahatedici edir və İranın əsl simasını açıq nümayiş etdirir. Tədris müəssisəsinin yaxınlığına zərbə endirilməsi mülki insanların, o cümlədən uşaqların həyatının necə böyük risk altına atıldığını açıq şəkildə göstərir. Belə bir addım təkcə hərbi gərginlik deyil, həm də humanitar cinayətdir. Naxçıvan Azərbaycanın əsasən mülki infrastruktura söykənən və strateji baxımdan həssas bölgələrindən biridir. Bu baxımdan mülki obyektlərin və xüsusilə təhsil müəssisələrinin hədəfə çevrilməsi regionda təhlükəsizlik məsələlərinin nə qədər kövrək olduğunu bir daha ortaya qoyub. Məktəb yaxınlığında baş verən hücum, uşaqların və müəllimlərin həyatının bir anın içində təhlükəyə düşməsi bütün Azərbaycan əhalisində böyük narahatlıq yaradıb.
Digər tərəfdən diqqətçəkən məqamlardan biri də odur ki, regionda ABŞ və Avropa İttifaqına məxsus hərbi missiyalar və müxtəlif strukturlar məhz Ermənistan ərazisində fəaliyyət göstərir. Buna baxmayaraq, İranın hədəf kimi Azərbaycanın mülki infrastrukturunu və uşaqları seçməsi onun niyyətini açıq-aşkar ortaya qoyur. Əgər rəsmi Tehranın iddia etdiyi kimi, regionda hansısa xarici hərbi mövcudluq əsas problem kimi göstərilirsə, bu halda hədəf Azərbaycan yox, məhz ABŞ-nin hərbi bazası olan Ermənistan seçilməli idi. Baş verən hadisə bir daha göstərib ki, belə hücumlar təkcə hərbi gərginliyi artırmaqla qalmır, həm də mülki insanların təhlükəsizliyini birbaşa təhdid altına qoyur. Xüsusilə uşaqların təhsil aldığı bir məkanın yaxınlığında belə bir zərbənin baş verməsi İran rejiminin atdığı addımların region üçün nə qədər təhlükəli nəticələr doğura biləcəyini açıq şəkildə nümayiş etdirir. Bu isə istər-istəməz İranın apardığı siyasətin mahiyyəti və məqsədləri barədə mesaj verir.
Məsələ ilə bağlı politoloq Taleh Əliyev Sfera.az-a açıqlama verib.
Onun sözlərinə əsasən, İran üçün insanların, xüsusilə də mülki şəxslərin, uşaqların və qadınların ölümü, xəsarət alması heç də faciə hesab edilmir:
“Onlar üçün önəmli olan öz avantürist ideologiyalarını Yaxın Şərqdə yaymaq və regionu bir növ qan çanağına çevirməkdir. Dini liderin və onunla bərabər İran generalının ölümündən sonra biz növbəti günlərdə İran rəhbərliyi tərəfindən Yaxın Şərqin demək olar ki, istisnasız olaraq bütün ərəb ölkələrinə qarşı birbaşa hücumların edilməsinin şahidi olduq. Bunun fonunda dünən Türkiyə ərazisinə raket atılması, bu gün isə Azərbaycana dronlarla hücum edilməsi onu göstərir ki, İran hakimiyyəti artıq xaotik vəziyyətdədir, rejim aqnoziya mərhələsindədir və proseslərə obyektiv, soyuqqanlı yanaşma nümayiş etdirə bilmir”.
Ekspert bu gündən etibarən İran rejiminin hakimiyyətdə qaldığı hər günün təkcə İran xalqı üçün deyil, bütün Yaxın Şərq və İslam dünyası üçün ciddi təhlükə mənbəyinə çevrildiyini qeyd edib:
“Bu rejimin hakimiyyətinin sonlandırılması Yaxın Şərqdə gələcək üçün yeni, sabit, firavan və təhlükəsiz bir mərhələnin başlanğıcına çevriləcək. Təəssüflər olsun ki, Azərbaycan dövləti növbəti dəfə xain qonşumuz İranın açıq və aşkar təcavüzü ilə üz-üzə qalmış oldu. Azərbaycan hər nə qədər İrana qarşı humanist yanaşsa da, onlardan daim xainlik görmüşük. Biz İrandakı şovinist, faşist və ekstremist hərbi birləşmələrin Azərbaycana qarşı davamlı olan məkrli planları səbəbindən bu gün səhər saatlarında Naxçıvanda həm Azərbaycanın digər hissələri ilə yeganə əsas əlaqə vasitəsi olan Naxçıvan aeroportunun vurulmasının, həm də azyaşlı uşaqların təhsil aldığı orta məktəbin yaxınlığına dron hücumunun edilməsinin şahidi olduq. Ona görə də məhz İran rejimi devrilməlidir”.
