Vaşinqton və Tehran arasında hərbi gərginliyin dayandırılması istiqamətində çərçivə sazişi üzrə intensiv diplomatik müzakirələrin davam etdiyi bir vaxtda, regional cəbhədə real vəziyyət kəskin olaraq qalır. Livanda rəsmən qüvvədə olan atəşkəs rejiminə baxmayaraq, İsrail ordusu ilə “Hizbullah” hərəkatı arasında qarşılıqlı ağır zərbələr endirilməsi davam edir.
NOCOMMENT.az xəbər verir ki, Livanın rəsmi NNA agentliyinin yaydığı məlumata görə, həftənin birinci günü İsrail Hərbi Hava Qüvvələri, pilotsuz uçuş aparatları (PUA) və artilleriya bölmələri Livanın cənub ərazilərinə kütləvi zərbələr endirib. Nəbatiyə şəhəri yaxınlığında hərəkətdə olan mülki avtomobillərin hədəfə alınması nəticəsində azı 3 nəfərin həlak olduğu bildirilir.
İsrail Müdafiə Ordusu (SADAQ) isə öz növbəsində “Hizbullah” tərəfindən ölkənin şimal rayonlarına doğru bir neçə kamikadze dronunun buraxıldığını elan edib. Sosial şəbəkələrdə yayılan görüntülərdə PUA-lardan birinin Metula yaşayış məntəqəsindəki evlərdən birinin damına birbaşa zərbə endirdiyi əks olunub. Bundan əlavə, Livanın cənubunda İsrail hərbçilərinin nəzarət etdiyi zonada da dronun düşdüyü qeydə alınıb. İsrail tərəfi bu hücumlar zamanı hər hansı insan tələfatı və ya xəsarət alanlar barədə məlumat verməyib.
Eyni zamanda, İsrail Silahlı Qüvvələrinin Baş Qərargah rəisi Eyal Zamir şimal cəbhəsində “hərbi əməliyyatların davam etdirilməsi” ilə bağlı yeni strateji planları təsdiqlədiyini bəyan edib. Rəsmi Təl-Əviv atəşkəs razılaşmasına rəğmən, Livanın cənubundakı sərhədyanı bölgələrdə öz hərbi mövcudluğunu qoruyub saxlayır və “Hizbullah”ın infrastrukturuna qarşı əməliyyatları dayandırmır.
Yaranmış vəziyyət İsrailin daxili siyasi rəhbərliyində də reaksiyalara səbəb olub. Ölkənin Milli Təhlükəsizlik naziri İtamar Ben-Qvir son PUA hücumlarından dərhal sonra Baş nazir Benyamin Netanyahunu Livanda “intensiv müharibə” fazasına təcili şəkildə geri dönməyə çağırıb.
