May ayının son günlərində müşahidə olunan güclü leysan yağışları kənd təsərrüfatına ciddi təsir göstərməyə başlayıb.
Gündəm24.az ölke.az-a istinadla xəbər verir ki, mütəxəssislər xəbərdarlıq edir ki, hava şəraitinin bu cür davam etməsi bəzi meyvələrin azalmasına və bazarlarda qiymət artımına səbəb ola bilər.
Xüsusilə ərik, gilas, albalı, çiyələk və alça kimi mövsümi meyvələr leysanlardan daha çox zərər görür. Güclü yağış nəticəsində meyvələr çatlayır, çürüyür və ağacdan vaxtından əvvəl tökülür. Bu isə məhsul itkisini artırır.
Məhsulun azalması birbaşa bazardakı qiymətlərə təsir edir. Əgər yaxın günlərdə yağışlı hava davam edərsə, mayın sonu və iyun ayında bəzi yerli meyvələrin qiymətində ciddi artım müşahidə oluna bilər.
Fermerlər bildirirlər ki, artıq bəzi bağlarda ilkin zərərlər görünməyə başlayıb. Torpaqda həddindən artıq rütubət göbələk xəstəliklərini artırır, bu da məhsulun keyfiyyətini aşağı salır və satış üçün yararlı meyvələrin sayını azaldır.
Mütəxəssislər hesab edirlər ki, bazara çıxarılan məhsul azaldıqca qiymətlər mərhələli şəkildə yüksələcək. Xüsusilə yerli və təzə meyvələrdə bahalaşmanın daha çox hiss ediləcəyi proqnozlaşdırılır.
