Məktəblərdə tamştatlı əməkhaqqı sisteminə keçidlə bağlı aparılan müzakirələr müəllimlərin fəaliyyətinin qiymətləndirilməsi ilə bağlı yeni yanaşmaları da gündəmə gətirir. Deputat Elnarə Akimova hesab edir ki, gələcəkdə müəllimlərin əməkhaqqının yalnız dərs yükünə görə deyil, həm də hazırladıqları şagirdlərin əldə etdikləri nəticələr nəzərə alınmaqla diferensiallaşdırılması mümkündür. Lakin bu model obyektiv və çoxmeyarlı qiymətləndirmə prinsipləri əsasında qurulmalıdır.
Gündəm24.az bildirir ki, Modern.az-a danışan deputat bildirib ki, tamştatlı əməkhaqqı sistemi ilk baxışda yalnız maaş mexanizminin dəyişdirilməsi kimi görünsə də, əslində müəllim peşəsinin mahiyyətinə yeni yanaşmanın formalaşdırılması deməkdir:
“Bu, müəllimin yalnız keçdiyi dərs saatına görə deyil, məktəbin ümumi fəaliyyətində, şagirdlərin inkişafında və təhsil mühitinin formalaşmasında oynadığı rolun daha obyektiv qiymətləndirilməsi istiqamətində mühüm addım hesab oluna bilər”.
Deputatın sözlərinə görə, müəllimin peşəkarlığını göstərən əsas meyarlardan biri onun yetişdirdiyi şagirdlərin uğurlarıdır.
“Respublika və beynəlxalq fənn olimpiadalarında qazanılan uğurlar, qəbul imtahanlarında yüksək nəticələr, beynəlxalq müsabiqələrdə, elmi layihələrdə, startap yarışlarında və digər intellektual platformalarda əldə edilən nailiyyətlər müəllimin uzun illər ərzində sərf etdiyi zəhmətin real göstəricisidir”.
Elnarə Akimova hesab edir ki, nəticəyönümlü qiymətləndirmə müəllimlər arasında sağlam rəqabət mühiti yarada bilər. Onun fikrincə, belə yanaşma müəllimləri yalnız proqramı başa çatdırmağa deyil, hər bir şagirdin potensialını üzə çıxarmağa, yeni tədris metodlarından və müasir texnologiyalardan istifadəyə daha çox həvəsləndirəcək.
Bununla yanaşı, deputat diferensial əməkhaqqı sisteminin yalnız qəbul imtahanlarının nəticələrinə əsaslanmasının doğru olmadığını vurğulayıb:
“Əgər qiymətləndirmə yalnız test ballarına əsaslansa, bu, məktəbin əsas missiyasını kölgədə qoya bilər. Məktəb sadəcə universitetə abituriyent hazırlayan müəssisə deyil, vətəndaş, şəxsiyyət və milli-mənəvi dəyərlərə bağlı insan yetişdirən təhsil ocağıdır”.
Deputatın sözlərinə görə, qiymətləndirmə zamanı müəllimin peşəkar inkişafı, sertifikatlaşdırma nəticələri, şagirdlərin ümumi bilik artımı, olimpiada və müsabiqələrdə qazandıqları uğurlar, innovativ layihələrdə iştirakı, rəqəmsal bacarıqları, məktəbin ictimai həyatındakı fəallığı, valideynlərlə əməkdaşlığı və inklüziv təhsilə verdiyi töhfə də nəzərə alınmalıdır.
Deputat hesab edir ki, müəllimlərin fəaliyyət göstərdikləri mühit də qiymətləndirmə mexanizminin tərkib hissəsi olmalıdır:
“Şəhər məktəbi ilə ucqar kənd məktəbinin imkanları eyni deyil. Bəzi müəllimlər istedadlı uşaqlarla işləyir, digərləri isə sosial baxımdan həssas qruplara mənsub şagirdlərin təhsilinə dəstək verir. Ona görə də qiymətləndirmə mexanizmi müəllimin fəaliyyət göstərdiyi mühiti də nəzərə almalı, heç kəs üçün ədalətsiz rəqabət yaratmamalıdır”.
Elnarə Akimova sonda bildirib ki, tamştatlı əməkhaqqı sistemi tətbiq edilərkən nəticəyönümlü diferensial əməkhaqqı modelinin də mərhələli şəkildə formalaşdırılması məqsədəuyğundur. Onun fikrincə, bu model müəllimin bütün peşə fəaliyyətini, şagirdin inkişafını və məktəbə verdiyi töhfəni əhatə edən obyektiv və şəffaf qiymətləndirmə mexanizmi əsasında qurulmalıdır. Bu isə həm müəllim peşəsinin nüfuzunun yüksəlməsinə, həm də Azərbaycan təhsilinin keyfiyyətinin artırılmasına xidmət edəcək.
