Hollivud aktrisası Şarliz Teron keçmişindən sarsıdıcı bir hadisəni ilk dəfə ətraflı şəkildə danışıb. O, anasının özünü müdafiə etmək məqsədilə atasını güllələdiyi gecəni xatırladığını bildirib.
Gündəm24.az Ajans.az-a istinadən xəbər verir ki, 50 yaşlı aktrisa The New York Times nəşrinə verdiyi müsahibədə hadisənin 1991-ci ildə, onun 15 yaşı olarkən Cənubi Afrikada baş verdiyini deyib. Onun sözlərinə görə, atası Çarlz Teron sərxoş vəziyyətdə olub və ailəni hədələyərək silahla evə daxil olmağa çalışıb.
Aktrisa qeyd edib ki, atası son dərəcə aqressiv idi və ailə üzvlərinin həyatına təhlükə yaradırdı. Hadisə zamanı o və anası Gerda Maritz evdə olublar.
Teronun sözlərinə görə, atası qapıdan atəş açmağa başlayanda anası seyfdən silah götürərək onları qorumağa çalışıb. Qarşıdurma zamanı o, cavab atəşi açıb və nəticədə kişi həyatını itirib.
Aktrisa bildirib ki, bu ağır hadisəyə baxmayaraq, o bunu ömürlük travma kimi qəbul etmir: “Mən buna aludə deyiləm və daim bununla yaşamıram. Amma bu cür hekayələr danışılmalıdır ki, insanlar özlərini tənha hiss etməsinlər”.
Teron həmçinin vurğulayıb ki, məişət zorakılığı uzun illər cəmiyyətdə kifayət qədər diqqət görməyib və bu, bir çox qadının dəstəksiz qalmasına səbəb olub.
Qeyd edək ki, Şarliz Teron uzun illərdir insan hüquqları sahəsində, xüsusilə məişət zorakılığına qarşı mübarizədə fəal iştirak edir və bu mövzuda maarifləndirmə işləri aparır.
