“İmralı prosesi sadəcə nümayəndə heyətinin səfəri kimi qəbul edilməməlidir. Bu, əldə edilən uğurların danışıqlar masasında təsdiqlənməsi, təşkilatın ləğvi prosesinin təmin edilməsi və Türkiyənin regional strateji nəzarətinin möhkəmləndirilməsi deməkdir”.
Gündəm24.az Globalinfo.az-a istinadən xəbər verir ki, “Türkiyə Gazetesi” yazarı, siyasi ekspert Nur Tuğba Aktay bildirib. O, nümayəndə heyətinin səfərinin Türkiyə Böyük Millət Məclisinin çətiri altında Ədalət və İnkişaf Partiyası, Milliyyətçi Hərəkat Partiyası və Demokratik Bölgələr Partiyası millət vəkillərinin qanunvericilik himayəsi altında həyata keçirilən şəffaf bir proses olduğunu qeyd edib. Siyasi ekspertin sözlərinə görə məqsəd simvolik bir nümayiş deyil, Türkiyənin danışıqlar masasında üstünlüyünü təmin etməkdir:
“Bu, həm də milli təhlükəsizlik, hüquqi sabitlik və regional tarazlıq üçün vacibdir. Tarixə nəzər saldıqda, Osmanlıdan sonrakı dövrdə Türkiyənin Yaxın Şərq və Qafqazda sərhədlərini və etnik və məzhəb tarazlığını qorumaq üçün davamlı olaraq diplomatik və strateji manevrlər etdiyini görmək olar. Bu gün də yerdəki güc danışıqlar masasında nəzarət ilə möhkəmləndirilir”.
N.T.Aktay səfərdə ən vacib məqamın Abdullah Öcalan vasitəsilə SDG-yə “silahlarınızı yerə qoyun” çağırışının edilməsi olduğunu xüsusi vurğulayıb:
“Öcalanın simvolik çəkisi təşkilatın dağılmasını sürətləndirəcək psixoloji təsirə malikdir. Bu çağırış ABŞ və İsrailin bölgədəki ekspansionist, etnik və məzhəbçi müdaxilələrini pozacaq, Türkiyənin sərhəd təhlükəsizliyini və Suriyanın şimalında sabitliyi təmin edəcək.
İsrailin ekspansionist siyasəti, ABŞ-ın strateji müdaxilələri, İran və digər aktorların bölgəyə təsir göstərmək cəhdləri Türkiyənin sərhədləri və etnik və məzhəb tarazlığı üzərindən bölgədə sabitliyi pozmaq potensialına malikdir. Bu aktorlar 2026-cı ildə strategiyalarını yenidən formalaşdırarkən, Türkiyə yerdəki qüvvələr nisbətini, enerji xətlərini, miqrasiya yollarını və geosiyasi ittifaqları idarə etməlidir”.
Nur Tuğba Aktay
Türkiyəli yazar İmralı prosesinin və SDG-yə çağırışın sadəcə daxili təhlükəsizlik tədbirləri deyil, bögədəki strateji üstünlük, diplomatik danışıqlar aparmaq və Türkiyənin nəzarət mexanizminin təmin etmək üçün vasitə olduğunu vurğulayıb:
“Bu məqamda, Azərbaycanlı qardaşlarımız da bilməlidirlər ki, Türkiyənin regiondakı rolu yalnız öz təhlükəsizliyi üçün vacib deyil; bu, həm də regional sülh, sabitlik və qardaş xalqlarla strateji həmrəylik baxımdan zəruridir. Türkiyə ilə Azərbaycan arasındakı tarixi, mədəni və strateji əlaqələr bu prosesin regional təsirini daha da əhəmiyyətli edir. Yaxın Şərqdə və Qafqazda sabitliyin təmin edilməsi güclü və uzaqgörən diplomatiya vasitəsilə əldə edilmiş nəzarəti danışıqlar masasına götürməkdən asılıdır”.
Aktay, yekun olaraq, İmralı prosesinin və dövlətin strateji addımlarının təkcə terrorizmin aradan qaldırılması üçün deyil, həm də 2026-cı il qlobal və regional geosiyasi nizamda Türkiyənin xeyrinə bir tarazlığın yaradılması və xarici aktorların bölgə üzərindən manipulyasiya cəhdlərinin neytrallaşdırılması üçün vacib olduğunu deyib. Bildirib ki, bu prosesi anlamaq istəyənlər ona gündəlik siyasi müzakirələrə görə deyil, tarixi perspektiv, strateji müdriklik və regional məsuliyyət hissi ilə yanaşmalıdırlar.
