Pirşağı ərazisində dənizdən qumların çıxarılması ilə bağlı sosial şəbəkələrdə yayılan görüntülər müzakirələrə səbəb olub. İddialara görə, aparılan işlər sahil zolağına təsir göstərə və ərazinin çimərlik kimi istifadəsini çətinləşdirə bilər.
Məsələ ilə bağlı Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidmətinin İctimaiyyətlə əlaqələr və təbliğat şöbəsinin rəisi, daxili xidmət polkovnik-leytenantı Akşin Əlili AZXEBER.COM-a açıqlamasında bildirib ki, xilasedici olmayan ərazilər təhlükəlidir.
“Xilasedici olmayan bütün su hövzələri təhlükəlidir. Çünki xilasedicilərin olduğu çimərliklərdə xüsusi təhlükəsizlik tədbirləri həyata keçirilir, sualtı müayinələr aparılır və digər zəruri nəzarət işləri görülür. Nəzarətsiz çimərliklərdə isə bu tədbirlər həyata keçirilmir, çünki həmin ərazilər çimərlik kimi nəzərdə tutulmayıb.
Həmin ərazidə ola bilsin ki, tikinti işi gedir. Vətəndaşlara bildiririk ki, xilasedici olmayan bu kimi ərazilərdən uzaq dursunlar”, – deyə Akşin Əlili qeyd edib.
Pirşağı sakini Akif Quliyev isə AZXEBER.COM-a bildirib ki, məsələ ilə bağlı həmin ərazidən torpaq daşınması dayandırılıb. Onun sözlərinə görə, əraziyə ip çəkilərək çimməyə məhdudiyyət qoyulub.
