Xalq artisti Röya Ayxanın “Çərçivədən kənar” verilişinə verdiyi müsahibə geniş müzakirələrə səbəb olub. O, uzun müddət küsülü olduğu mərhum həmkarı Aygün Bəylər barədə sərt fikirlər səsləndirərək bildirib ki, onu heç vaxt bağışlamayacaq. Sənətçinin bu açıqlaması ictimaiyyət tərəfindən birmənalı qarşılanmayıb.
Ölmüş biri haqqında “onu heç vaxt bağışlamayacağam” demək islamda və digər inanclarda necə qəbul olunur? Öldükdən sonra insanln bağışlanması həmin şəxsin günahlarını təmizləyirmi? “Haqq dünyada bağışlanır” ifadəsinin dini mənası nədir?
Gündəm24.az Globalinfo.az-a istinadən xəbər verir ki, Qafqaz Müsəlmanları İdarəsi Qazılar Şurasının üzvü, ilahiyyatçı Rüfət Qarayev deyib ki, müsəlman gərək dünyada ikən insanlarla halallaşıb, Allahın hüzuruna çıxarkən təmiz çıxsın:
“Təbii ki, biz insan olduğumuz üçün müxtəlif xəta və günahlarımız mövcuddur. Bəndə tövbə etdikdən sonra Allah onun günahlarını bağışlayır. Amma istisna hal bundan ibarətdir ki, haqqı üzərimizdə olan insanlar bizə halallıq verməsələr, Allah bizi bağışlamayacaq. Bunun üçün də çalışmalıyıq ki, axirət həyatına köçmədən öncə dünyada ikən insanlarla halallaşaq. Əgər halallaşmamışıqsa da, dünyadan köçənin yaxınları haqq sahiblərindən halallıq almağa çalışsınlar. Hər kəs bir gün Allahın hüzuruna gedəcək”.
Rüfət Qarayev
Rüfət Qarayev bildirib ki, bu dünyanın fani olduğunu nəzərə alaraq insanları bağışlamağımız daha məqsədə uyğundur:
“Sən bağışla ki, Allah da səni bağışlasın. Amma sən həmin dünyasını dəyişmiş şəxsi bağışladığın halda belə Allah onu bağışlayacaqmı, bu da başqa bir məsələdir. Onun üçün də sənə düşən vəzifə özünü təmizləmək və qəlbini rahatlaşdırmaq üçün bağışlamaq yolunu tutmaq ən doğru olanıdır”.
Xatırladaq ki, Aygün Bəylər illər əvvəl verilişlərdən birində aparıcının Röyanın ünvanına “sənətkar” ifadəsi işlətməsinə etiraz edərək studiyanı tərk etmişdi. Röya bunu “şərəf və ləyaqətinin alçaldılması” kimi qəbul edərək mərhum sənətçini məhkəməyə vermişdi.
